തിരുവനന്തപുരം: സംസ്ഥാനത്ത് പി.എസ്.സി പിരിച്ചുവിടാന്‍ രാഷ്ട്രപതിക്ക് ശുപാര്‍ശ നല്‍കിയ ഗവര്‍ണറുടെ നടപടി വേണ്ടത്ര നടപടിക്രമങ്ങള്‍ പാലിച്ചുകൊണ്ടുള്ളതല്ലെന്ന് മുഖ്യമന്ത്രി വി. ഡി. സതീശന്‍ വ്യക്തമാക്കി. ഇത്തരമൊരു നിര്‍ണ്ണായക നീക്കം നടത്തുന്നതിന് മുന്‍പ് ഗവര്‍ണര്‍ സംസ്ഥാന സര്‍ക്കാരുമായി യാതൊരുവിധ ആലോചനകളും നടത്തിയിട്ടില്ലെന്ന് മന്ത്രിസഭായോഗത്തിനു ശേഷമുള്ള വാര്‍ത്താസമ്മേളനത്തില്‍ അദ്ദേഹം പറഞ്ഞു. അതേസമയം, പി.എസ്.സിയില്‍ നടന്നത് ഞെട്ടിക്കുന്ന കാര്യങ്ങളും തികഞ്ഞ ക്രമക്കേടുകളുമാണെന്ന് അദ്ദേഹം തുറന്നടിച്ചു. സ്വന്തക്കാരെയും ബന്ധുക്കളെയും തിരുകിക്കയറ്റിയതിലൂടെ നഷ്ടപ്പെട്ട പി.എസ്.സിയുടെ വിശ്വാസ്യത വീണ്ടെടുക്കുമെന്നും കുറ്റക്കാരായ മുഴുവന്‍ ആളുകളെയും നിയമത്തിന് മുന്നില്‍ കൊണ്ടുവരുമെന്നും മുഖ്യമന്ത്രി കൂട്ടിച്ചേര്‍ത്തു. പി.എസ്.സി പരീക്ഷകളുമായി ബന്ധപ്പെട്ട് കൂടുതല്‍ പരാതികള്‍ ഉയര്‍ന്നുവരുന്നുണ്ടെന്നും സ്ഥാപനത്തിനുള്ളില്‍ തന്നെ അഭിപ്രായവ്യത്യാസങ്ങള്‍ നിലനില്‍ക്കുന്നുണ്ടെന്നും സൂചിപ്പിച്ച അദ്ദേഹം, അന്വേഷണം പുരോഗമിക്കുന്നതിനാല്‍ കൂടുതല്‍ വിവരങ്ങള്‍ വെളിപ്പെടുത്തുന്നില്ലെന്ന് അറിയിച്ചു.
മന്ത്രിസഭായോഗത്തിലെ മറ്റ് തീരുമാനങ്ങള്‍ വിശദീകരിച്ച മുഖ്യമന്ത്രി, ഐ.എ.എസ് ഉദ്യോഗസ്ഥരുടെ മാറ്റം ഭരണപരമായ സ്വാഭാവിക നടപടിക്രമം മാത്രമാണെന്ന് വ്യക്തമാക്കി. സര്‍ക്കാരിന്റെ സ്വപ്നപദ്ധതിയായ അന്താരാഷ്ട്ര മാരിടൈം മ്യൂസിയത്തിന്റെ കരട് രൂപരേഖയ്ക്ക് മന്ത്രിസഭ അംഗീകാരം നല്‍കിയതായും അദ്ദേഹം അറിയിച്ചു. കൂടാതെ, കോഴിക്കോട് കോര്‍പ്പറേഷനില്‍ നിന്ന് പിരിച്ചുവിടപ്പെട്ട ജീവനക്കാര്‍ക്ക് ആശ്വാസമായി അവരെ സൂപ്പര്‍ന്യൂമററി തസ്തികകള്‍ സൃഷ്ടിച്ച് സര്‍വീസില്‍ നിലനിര്‍ത്താന്‍ തീരുമാനമായി. ആരോഗ്യവകുപ്പില്‍ ഡെന്റല്‍ ഹൈജീനിസ്റ്റ് ഗ്രേഡ്-2 വില്‍ 12 പുതിയ തസ്തികകളും, കാത്ത് ലാബ് ടെക്‌നീഷ്യന്‍ വിഭാഗത്തിലേക്ക് 16 പുതിയ തസ്തികകളും സൃഷ്ടിക്കാനും മന്ത്രിസഭായോഗം അംഗീകാരം നല്‍കി.
പി എസ് സി പിരിച്ചുവിടാനുള്ള ഗവര്‍ണറുടെ നടപടിക്രമം ശരിയല്ല; സര്‍ക്കാരുമായി ആലോചിച്ചില്ലെന്ന് മുഖ്യമന്ത്രി വി.ഡി. സതീശൻ
Jaihind TV News Report
Jaihind TV Web Desk
2 min read
166 reads
