ചേരാനല്ലൂർ വാഹനാപകടക്കേസുമായി ബന്ധപ്പെട്ട് ചോദ്യം ചെയ്യലിനായി കേസിൽ പ്രതിയായ 17 കാരന്റെ പിതാവും അഡീഷണൽ ജില്ലാ ജഡ്ജിയുമായ ഉദ്യോഗസ്ഥൻ ഇന്ന് പോലീസിന് മുന്നിൽ ഹാജരാകും. ജഡ്ജിയുടെ അറസ്റ്റ് നടപടികളിലേക്ക് കടക്കുന്നതിനായി അന്വേഷണ സംഘം നേരത്തെ ഹൈക്കോടതിയുടെ അനുമതി തേടിയിട്ടുണ്ടെങ്കിലും, അദ്ദേഹത്തിനെതിരെ തിടുക്കപ്പെട്ട് അറസ്റ്റ് ഉൾപ്പെടെയുള്ള കടുത്ത നടപടികളിലേക്ക് പോലീസ് കടക്കില്ലെന്നാണ് സൂചന.
കേസിൽ പോലീസ് സമർപ്പിക്കുന്ന വിശദമായ അന്വേഷണ റിപ്പോർട്ട് പരിശോധിച്ച ശേഷമായിരിക്കും ജഡ്ജിക്കെതിരായ തുടർനടപടികളിൽ അന്തിമ തീരുമാനമെടുക്കുക. അതേസമയം, കേസിൽ അറസ്റ്റ് ഒഴിവാക്കുന്നതിനായി ജഡ്ജി നേരത്തെ തന്നെ ഹൈക്കോടതിയിൽ മുൻകൂർ ജാമ്യാപേക്ഷ സമർപ്പിച്ചിട്ടുണ്ട്. ഈ ജാമ്യഹർജി ഇന്ന് ഹൈക്കോടതി പരിഗണിക്കും.
