കോഴിക്കോട്: സാമ്പത്തിക പ്രതിസന്ധിയിലായാണ് സംസ്ഥാനത്തെ ഉച്ചഭക്ഷണ പദ്ധതി മുന്നോട്ട് പോവുന്നത്. സെപ്റ്റംബര്‍ മാസത്തിനു ശേഷം സ്‌കൂളുകള്‍ക്ക് പദ്ധതിക്കായി തുക ലഭിച്ചിട്ടില്ല. ഇതുവരെ 125 കോടി രൂപയുടെ കുടിശ്ശിക ഉണ്ടെന്ന് അധികൃതര്‍ അറിയിച്ചു.
40% തുക സംസ്ഥാന സര്‍ക്കാര്‍, 60% തുക കേന്ദ്രസര്‍ക്കാര്‍ എന്ന നിലയിലാണ് തുക അനുവദിക്കേണ്ടത്. ഇതുവരെ കേന്ദ്രസര്‍ക്കാരിന്‍റെ ഭാഗത്ത് നിന്നുള്ള തുക ലഭിച്ചിട്ടില്ല. കഴിഞ്ഞ സെപ്റ്റംബര്‍ മാസത്തില്‍ മാത്രമാണ് കേന്ദ്ര വിഹിതം ലഭിച്ചതെന്ന് അധികൃതര്‍ വ്യക്തമാക്കി. ഈ സാഹചര്യത്തില്‍, ഉച്ചഭക്ഷണം പേരില്‍ മാത്രം ഒതുങ്ങുമോ എന്ന വലിയ ചോദ്യം ഉയരുന്നുണ്ട്. 4 കോടി രൂപ വകയിരുത്തിയെങ്കിലും ഇത് വരെ വിതരണത്തിനായി അനുവദിച്ചിട്ടില്ല. സ്‌കൂള്‍ അധികൃതര്‍ ലക്ഷക്കണക്കിനു രൂപയുടെ ബാധ്യത അനുഭവിക്കുന്ന സാഹചര്യത്തില്‍ നിരവധി പരാതികള്‍ ഉയരുന്നതായി റിപ്പോര്‍ട്ടുകളില്‍ പറയുന്നുണ്ട്.
