ഒറിഗണ്‍: അമേരിക്കന്‍ സംസ്ഥാനമായ ഒറിഗണിലെ പ്രൈമറി സ്‌കൂളിലുണ്ടായ വെടിവെപ്പില്‍ മൂന്ന് കുട്ടികളും ഒരു അധ്യാപകനും കൊല്ലപ്പെട്ടു. 16 വയസ്സുകാരനായ അക്രമിയെ പിന്നീട് പൊലീസുമായുള്ള ഏറ്റുമുട്ടലില്‍ വെടിവെച്ചുകൊന്നു. ഒറിഗണിലെ ബെന്‍ഡ് നഗരത്തില്‍ പ്രവര്‍ത്തിക്കുന്ന 'സില്‍വര്‍ റെയില്‍ എലമെന്ററി സ്‌കൂളില്‍' വ്യാഴാഴ്ചയായിരുന്നു നാടിനെ നടുക്കിയ ഈ സംഭവം നടന്നത്.
സ്‌കൂളിന് പുറത്ത് നിര്‍ത്തിയിട്ടിരുന്ന കാറിന് നേരെ അജ്ഞാതന്‍ വെടിയുതിര്‍ത്തതായി ബെന്‍ഡ് പൊലീസിന് ആദ്യ അടിയന്തര സന്ദേശം ലഭിക്കുകയായിരുന്നു. സന്ദേശം ലഭിച്ച് നിമിഷങ്ങള്‍ക്കകം പോലീസ് സംഘം സംഭവസ്ഥലത്തെത്തിയപ്പോഴേക്കും അക്രമി വെടിയേറ്റു മരിച്ച നിലയിലായിരുന്നു. സ്ഥലത്തുണ്ടായിരുന്ന ആരെങ്കിലും ആയിരിക്കാം അക്രമിയെ വെടിവെച്ചതെന്നാണ് പ്രാഥമിക നിഗമനം. എന്നാല്‍ അക്രമിയെ വെടിവെച്ചുകൊന്നത് ആരാണെന്ന് അന്വേഷണ ഉദ്യോഗസ്ഥര്‍ ഇതുവരെ സ്ഥിരീകരിച്ചിട്ടില്ലെന്ന് ബെന്‍ഡ് പോലീസ് വക്താവ് ഷീലാ മില്ലര്‍ മാധ്യമങ്ങളോട് പറഞ്ഞു.
വെടിവെപ്പില്‍ പരിക്കേറ്റവരെ ആശുപത്രിയില്‍ പ്രവേശിപ്പിച്ചിട്ടുണ്ടെന്ന് അറിയിച്ച മില്ലര്‍, ഇവരുടെ ആരോഗ്യനിലയെക്കുറിച്ചുള്ള വിവരങ്ങള്‍ ലഭ്യമായിട്ടില്ലെന്നും വ്യക്തമാക്കി. അതിനിടെ, കുട്ടികളടക്കം നിരവധി പേര്‍ക്ക് ആക്രമണത്തില്‍ പരിക്കേറ്റിട്ടുണ്ടെന്നാണ് പോലീസ് നല്‍കുന്ന വിവരം. സംഭവത്തില്‍ ഒരു മുതിര്‍ന്ന വ്യക്തിയും മൂന്ന് കുട്ടികളും കൊല്ലപ്പെട്ടതായി ഔദ്യോഗിക വിവരങ്ങളെ ഉദ്ധരിച്ച് പ്രമുഖ മാധ്യമങ്ങള്‍ റിപ്പോര്‍ട്ട് ചെയ്തു. എന്നാല്‍ കൊല്ലപ്പെട്ടവരുടെ കണക്കില്‍ അക്രമിയും ഉള്‍പ്പെടുന്നുണ്ടോ എന്ന് വ്യക്തമല്ല.
കിന്റര്‍ഗാര്‍ട്ടന്‍ മുതല്‍ അഞ്ചാം ക്ലാസ് വരെയുള്ള, ഏകദേശം 5 മുതല്‍ 11 വയസ്സ് വരെ പ്രായമുള്ള കുട്ടികളാണ് സില്‍വര്‍ റെയില്‍ എലമെന്ററി സ്‌കൂളില്‍ പഠിക്കുന്നത്. ഏകദേശം 450 വിദ്യാര്‍ത്ഥികളും 40 ജീവനക്കാരുമാണ് ഇവിടെയുള്ളതെന്ന് ഷീലാ മില്ലര്‍ പറഞ്ഞു. ആക്രമണത്തിലേക്ക് നയിച്ച സാഹചര്യങ്ങള്‍, കൊല്ലപ്പെട്ടവരുടെ തിരിച്ചറിയല്‍ വിവരങ്ങള്‍, അക്രമി മരിക്കാനിടയായ സംഭവവികാസങ്ങള്‍ എന്നിവയില്‍ പോലീസ് അന്വേഷണം തുടരുകയാണ്.
അമേരിക്കന്‍ എലിമെന്ററി സ്‌കൂളില്‍ വെടിവയ്പ്പ്: നാല് പേര്‍ കൊല്ലപ്പെട്ടു; പതിനാറുകാരനായ അക്രമിയും കൊല്ലപ്പെട്ടതായി വിവരം
Jaihind TV News Report
Jaihind TV Web Desk
2 min read
143 reads
