തിരുവനന്തപുരം: മുതിർന്ന കോൺഗ്രസ് പ്രവര്‍ത്തകയും സ്വാതന്ത്ര്യസമര പോരാട്ടങ്ങളിലെ സജീവ സാന്നിധ്യവുമായിരുന്ന സരോജിനി ഭാസ്കർ (98) അന്തരിച്ചു. നാടിന് പ്രിയപ്പെട്ട 'പേരൂർക്കട അമ്മ' എന്ന പേരിൽ അറിയപ്പെട്ടിരുന്ന അവർ വാർദ്ധക്യസഹജമായ അസുഖങ്ങളെ തുടർന്നാണ് വിടവാങ്ങിയത്.
പ്രമുഖ സ്വാതന്ത്ര്യസമര സേനാനിയായിരുന്ന ഭർത്താവ് പി.കെ. ഭാസ്കരനൊപ്പം സ്വാതന്ത്ര്യസമര പ്രക്ഷോഭങ്ങളിലും നിരവധി സാമൂഹിക-രാഷ്ട്രീയ സമരങ്ങളിലും സജീവമായി പങ്കെടുത്ത പാരമ്പര്യമാണ് സരോജിനി ഭാസ്കർക്കുള്ളത്. തലസ്ഥാനത്തെ കോൺഗ്രസ് പാർട്ടി കെട്ടിപ്പടുക്കുന്നതിൽ പ്രധാന പങ്കുവഹിച്ച അവർ, പതിറ്റാണ്ടുകളോളം മണ്ഡലത്തിലെയും ജില്ലയിലെയും പാർട്ടി പ്രവർത്തനങ്ങളുടെ കേന്ദ്രബിന്ദുവായിരുന്നു.
ഇന്ന് രാവിലെ 11.30 മുതൽ വസതിയിൽ പൊതുദർശനത്തിന് വെക്കുന്ന മൃതദേഹം, ഉച്ചയ്ക്ക് 1.30-ഓടെ തൈക്കാട് ശാന്തികവാടത്തിൽ ഔദ്യോഗിക ബഹുമതികളോടെ സംസ്കരിക്കും. സ്വാതന്ത്ര്യസമര സ്മരണകളും കോൺഗ്രസ് പ്രസ്ഥാനത്തിന്റെ കരുത്തുറ്റ പാരമ്പര്യവും പേറുന്ന നേതാവിന്റെ വിയോഗത്തിൽ പ്രമുഖ രാഷ്ട്രീയ-സാമൂഹിക നേതാക്കൾ അനുശോചനം രേഖപ്പെടുത്തി.
