കണ്ണൂര്‍: കനത്ത മഴയിലും മിന്നല്‍പ്രളയത്തിലും തകര്‍ന്ന പയ്യാവൂര്‍ ചന്ദനക്കാംപാറയിലെ ആനയടി പാലത്തിന് പകരം അടിയന്തരമായി താല്‍ക്കാലിക ബെയ്ലി പാലം നിര്‍മ്മിക്കണമെന്ന് ആവശ്യപ്പെട്ട് കെ. സുധാകരന്‍ എം.പി കേന്ദ്ര പ്രതിരോധ മന്ത്രി രാജ്നാഥ് സിംഗിന് കത്തയച്ചു.
പാലം പൂര്‍ണ്ണമായി തകര്‍ന്നതോടെ പ്രദേശത്തെ നിരവധി ഗ്രാമങ്ങളും നൂറുകണക്കിന് കുടുംബങ്ങളും പൂര്‍ണ്ണമായും ഒറ്റപ്പെട്ട നിലയിലാണ്. വിദ്യാര്‍ത്ഥികള്‍, അടിയന്തര ചികിത്സ ആവശ്യമായ രോഗികള്‍, ദിവസവേതന തൊഴിലാളികള്‍ എന്നിവരുള്‍പ്പെടെയുള്ള പ്രദേശവാസികളുടെ ഗതാഗതം പൂര്‍ണ്ണമായി തടസ്സപ്പെട്ടതായി എം.പി കത്തില്‍ ചൂണ്ടിക്കാട്ടി.
സ്ഥിരമായ പാലം നിര്‍മ്മിക്കുന്നതിന് രൂപകല്‍പ്പന, അനുമതികള്‍, നിര്‍മ്മാണ നടപടികള്‍ എന്നിവ പൂര്‍ത്തിയാക്കാന്‍ ഗണ്യമായ സമയമെടുക്കും. പ്രതികൂല കാലാവസ്ഥയും മലയോര മേഖലയുടെ സങ്കീര്‍ണ്ണതയും പരിഗണിച്ച്, ജനങ്ങളുടെ യാത്രാദുരിതത്തിന് അടിയന്തര പരിഹാരം കാണേണ്ടതുണ്ട്.
ഈ സാഹചര്യത്തില്‍, ഇന്ത്യന്‍ സൈന്യത്തെയോ ബോര്‍ഡര്‍ റോഡ്‌സ് ഓര്‍ഗനൈസേഷനെയോ ഉപയോഗപ്പെടുത്തി എഞ്ചിനീയറിംഗ് സംഘത്തെ അയക്കാനും, ആനയടിയില്‍ അടിയന്തരമായി താല്‍ക്കാലിക ബെയ്ലി പാലം യാഥാര്‍ത്ഥ്യമാക്കാനും നടപടി സ്വീകരിക്കണമെന്ന് കെ. സുധാകരന്‍ എം.പി കേന്ദ്ര മന്ത്രിയോട് ആവശ്യപ്പെട്ടു.
തകര്‍ന്ന ആനയടി പാലത്തിനു പകരം ബെയ്ലി പാലം നിര്‍മ്മിക്കണം: കെ. സുധാകരന്‍ എം.പി കേന്ദ്ര പ്രതിരോധ മന്ത്രിക്ക് കത്തയച്ചു
Jaihind TV News Report
Jaihind TV Web Desk
Updated Oct 12, 2026
2 min read
943 reads
