നാല് പതിറ്റാണ്ടിനു ശേഷം വീണ്ടും ഒന്നിക്കൽ; 'ജയിലർ 2' ലെ ഹൃതിക് റോഷന്റെ അതിഥി വേഷം തരംഗമാകുന്നു

രജനികാന്ത് നായകനായെത്തിയ ബിഗ് ബജറ്റ് ചിത്രം 'ജയിലർ 2'-ൽ ബോളിവുഡ് താരം ഹൃതിക് റോഷന്റെ അതിഥിവേഷം ആരാധകർക്കിടയിൽ വലിയ ആവേശമാണ് സൃഷ്ടിച്ചിരിക്കുന്നത്. ചിത്രത്തിൽ 'റോഡി' എന്ന കഥാപാത്രമായാണ് ഹൃതിക് എത്തിയത്. താരത്തിന്റെ സ്റ്റൈലിഷ് വരവും ആത്മവിശ്വാസവും സ്ക്രീൻ പ്രസൻസും സ്വാഗും ആരാധകർ വലിയ ആവേശത്തോടെയാണ് ഏറ്റെടുത്തിരിക്കുന്നത്. നാല് പതിറ്റാണ്ടിനു ശേഷമാണ് രജനികാന്തും ഹൃതിക് റോഷനും ഒരു സിനിമയിൽ ഒന്നിക്കുന്നത് എന്നത് ചിത്രത്തിന്റെ പ്രധാന ആകർഷണങ്ങളിൽ ഒന്നാണ്.

ഇതിനു മുൻപ് 1986-ൽ പുറത്തിറങ്ങിയ 'ഭഗവാൻ ദാദ' എന്ന ചിത്രത്തിലാണ് ഇരുവരും ഒരുമിച്ച് അഭിനയിച്ചത്. അന്ന് ബാലതാരമായിരുന്ന ഹൃതിക്, രജനികാന്തിന്റെ കഥാപാത്രത്തിന്റെ ദത്തുപുത്രനായ 'ഗോവിന്ദ്' എന്ന കഥാപാത്രത്തെയാണ് അവതരിപ്പിച്ചത്. വർഷങ്ങൾക്ക് ശേഷം വീണ്ടും ഇരുവരും സ്ക്രീനിൽ ഒന്നിക്കുമ്പോൾ വെള്ളിത്തിരയിൽ അത് വിസ്മയമായി മാറുകയാണ്. രജനികാന്തിന്റെ അഭിനയശൈലിയോടും അനിരുദ്ധ് രവിചന്ദറിന്റെ പശ്ചാത്തല സംഗീതത്തോടുമൊപ്പം ഹൃതിക്കിന്റെ സ്വാഗും ഇപ്പോൾ സോഷ്യൽ മീഡിയയിൽ വലിയ ചർച്ചയായിട്ടുണ്ട്. ആക്ഷൻ രംഗങ്ങളിൽ കസറുന്ന ഹൃതിക്കിന്റെ സ്റ്റൈലും ഭാവങ്ങളും ഈയടുത്തകാലത്തൊന്നും ഇത്രയും മികച്ച രീതിയിൽ മറ്റ് ചിത്രങ്ങൾ ഉപയോഗിച്ചിട്ടില്ലെന്നാണ് ആരാധകരുടെ പക്ഷം. 'ജയിലർ 2'-ൽ അതിഥി വേഷത്തിലാണെങ്കിലും സ്ക്രീനിൽ താരമെത്തുന്ന സമയങ്ങളിലെല്ലാം അതിഗംഭീര പ്രകടനമാണ് കാഴ്ചവെക്കുന്നത്.

2023-ൽ പുറത്തിറങ്ങിയ ആദ്യഭാഗമായ 'ജയിലർ' അതിഥിതാരങ്ങളുടെ സാന്നിധ്യം കൊണ്ടും ഏറെ ശ്രദ്ധ നേടിയിരുന്നു. മോഹൻലാൽ, ശിവരാജ്കുമാർ, ജാക്കി ഷ്റോഫ് തുടങ്ങിയവരുടെ സാന്നിധ്യം വിവിധ ഭാഷാ സിനിമാവിപണികളിലേക്ക് ചിത്രത്തിന്റെ സ്വീകാര്യത വ്യാപിപ്പിക്കാൻ സഹായിച്ചിരുന്നു. എന്നാൽ രണ്ടാം ഭാഗത്തിൽ താരനിര കൂടുതൽ വിപുലീകരിച്ചിരിക്കുകയാണ്. മോഹൻലാൽ, ശിവരാജ്കുമാർ, ജാക്കി ഷ്റോഫ് എന്നിവർക്കൊപ്പം വിദ്യാ ബാലൻ, മിഥുൻ ചക്രവർത്തി, എസ്.ജെ. സൂര്യ തുടങ്ങിയവരും ചിത്രത്തിലുണ്ട്. ഇതിനൊപ്പം ഹൃതിക് റോഷന്റെ അതിഥിവേഷം കൂടി എത്തുന്നതോടെ 'ജയിലർ 2'വിലെ ആരാധകപ്രതീക്ഷകളും ആവേശവും വാനോളമുയർന്നിരിക്കുകയാണ്.