ഇൻഷുറൻസ് പോളിസി കമ്മീഷനിൽ നിയന്ത്രണം: പുതിയ നിരക്കുകൾ അറിയാം

ലൈഫ് ഇൻഷുറൻസ് പോളിസികളുടെ ഏജൻസി കമ്മീഷൻ നിരക്കുകൾ പുനഃസംഘടിപ്പിക്കുന്നതിനായി ഇൻഷുറൻസ് റെഗുലേറ്ററി ആൻഡ് ഡെവലപ്‌മെന്റ് അതോറിറ്റി ഓഫ് ഇന്ത്യ (IRDAI) പുതിയ കരട് നിർദേശം പുറപ്പെടുവിച്ചു. പ്രീമിയം അടയ്ക്കുന്ന കാലയളവിന് അനുസൃതമായി കമ്മീഷൻ നിരക്കുകളിൽ വ്യത്യാസം വരുത്തുന്ന രീതിയിലാണ് പുതിയ മാറ്റങ്ങൾ തയാറാക്കിയിരിക്കുന്നത്.

ദീർഘകാല പോളിസികൾക്ക് ആദ്യവർഷം ഉയർന്ന കമ്മീഷൻ ലഭിക്കുന്ന തരത്തിലാണ് പുതിയ ശുപാർശ. 5 വർഷത്തിൽ താഴെയുള്ള പ്രീമിയം കാലയളവിന് വിതരണ സ്ഥാപനങ്ങൾക്ക് 5%-ഉം ഏജന്റുമാർക്ക് 6.5%-ഉം ആണ് കമ്മീഷൻ. 5 വർഷത്തെ കാലയളവിലേക്ക് ഇത് യഥാക്രമം 10%-ഉം 12.5%-ഉം ആയിരിക്കും. 6 മുതൽ 8 വർഷം വരെയുള്ള പോളിസികൾക്ക് സ്ഥാപനങ്ങൾക്ക് 14%-ഉം ഏജന്റുമാർക്ക് 17.5%-ഉം ലഭിക്കും. 9 വർഷത്തേക്ക് 18%-ഉം 22.5%-ഉം, 10 വർഷമോ അതിൽ കൂടുതലോ ഉള്ള പോളിസികൾക്ക് യഥാക്രമം 20%-ഉം 25%-ഉം കമ്മീഷനാണ് നിർദേശിച്ചിട്ടുള്ളത്.

സിംഗിൾ പ്രീമിയം പ്ലാനുകൾക്കും നികുതിയിളവുള്ള ഉൽപ്പന്നങ്ങൾക്കും കുറഞ്ഞ കമ്മീഷനാണ് വ്യവസ്ഥ ചെയ്തിരിക്കുന്നത്. വ്യക്തിഗത സേവിങ്സ് പോളിസികളിൽ ആദ്യവർഷ കമ്മീഷൻ വിതരണക്കാർക്ക് 1%-ഉം ഏജന്റുമാർക്ക് 2%-ഉം ആയിരിക്കും. കൂടാതെ ഏജന്റുമാർക്കും വിതരണക്കാർക്കും നൽകുന്ന എല്ലാ ആനുകൂല്യങ്ങളും ഈ കമ്മീഷൻ പരിധിയിൽ ഉൾപ്പെടും. മുൻപ് പോളിസി കാലാവധിക്കനുസരിച്ച് 10% മുതൽ 35% വരെ കമ്മീഷൻ നൽകിയിരുന്ന സ്ഥാനത്താണ് ഇപ്പോൾ പരമാവധി നിരക്ക് 25% ആയി IRDAI പരിമിതപ്പെടുത്തിയിരിക്കുന്നത്.