നരേന്ദ്ര മോദി സ്റ്റേഡിയത്തിന് ബോംബ് ഭീഷണി; ഇന്ത്യ - ഓസ്ട്രേലിയ അണ്ടർ-19 മത്സരം തടസ്സപ്പെട്ടു

അഹമ്മദാബാദ്: ലോകത്തിലെ ഏറ്റവും വലിയ ക്രിക്കറ്റ് സ്റ്റേഡിയമായ അഹമ്മദാബാദിലെ നരേന്ദ്ര മോദി സ്റ്റേഡിയത്തിന് ബോംബ് ഭീഷണി. ഇന്ത്യ അണ്ടർ-19, ഓസ്ട്രേലിയ അണ്ടർ-19 ടീമുകൾ തമ്മിൽ നടന്നിരുന്ന യൂത്ത് ടെസ്റ്റ് മത്സരത്തിനിടെയാണ് ഭീഷണി സന്ദേശം ലഭിച്ചത്. ഇ-മെയിൽ മാർഗ്ഗമെത്തിയ ഭീഷണിയെ തുടർന്ന് സ്റ്റേഡിയത്തിൽ പോലീസും ബോംബ് ഡിസ്പോസൽ സ്ക്വാഡും ഫയർഫോഴ്സും ചേർന്ന് സുരക്ഷാ പരിശോധന നടത്തി.

ഒക്ടോബർ നാല് മുതൽ സ്റ്റേഡിയത്തിലെ ഗ്രൗണ്ട് എ-യിൽ ഇരുടീമുകളും തമ്മിലുള്ള ചതുർദിന മത്സരം നടക്കുകയായിരുന്നു. ബുധനാഴ്ച രാവിലെ 11.15-ഓടെയാണ് ഇ-മെയിൽ സന്ദേശം അധികൃതരുടെ ശ്രദ്ധയിൽപ്പെടുന്നത്. ഭീഷണിയെ തുടർന്ന് കളിക്കളത്തിലുണ്ടായിരുന്ന ഇരുടീമിലെയും താരങ്ങളെയും ഒഫീഷ്യലുകളെയും ഉടൻ തന്നെ സുരക്ഷിത സ്ഥാനങ്ങളിലേക്ക് മാറ്റി.

നവംബർ 21-ന് ഈ സ്റ്റേഡിയത്തിൽ വെച്ച് നടക്കാനിരിക്കുന്ന പ്രശസ്ത പഞ്ചാബി ഗായകൻ ദിൽജിത് ദോസാഞ്ചിന്റെ സംഗീത പരിപാടിക്കും ഇതേ സന്ദേശത്തിൽ ഭീഷണിയുണ്ട്. വ്യാജ സന്ദേശത്തിന്റെ ഉറവിടം കണ്ടെത്താനും ഇതിന് പിന്നിൽ പ്രവർത്തിച്ചവരെ പിടികൂടാനുമായി ഗുജറാത്ത് പോലീസും സൈബർ സെല്ലും അന്വേഷണം ഊർജ്ജിതമാക്കിയിട്ടുണ്ട്.