ചിക്കൻ സുരക്ഷിതമായി ഉപയോഗിക്കാൻ പാകം ചെയ്യുന്നതുപോലെ തന്നെ ശരിയായ രീതിയിൽ സൂക്ഷിക്കുന്നതും അത്യന്താപേക്ഷിതമാണ്. തെറ്റായ സംഭരണരീതികൾ ബാക്ടീരിയയുടെ വളർച്ചയ്ക്കും ഭക്ഷ്യവിഷബാധയ്ക്കും കാരണമാകാൻ സാധ്യതയുള്ളതിനാൽ ചില കാര്യങ്ങൾ നിർബന്ധമായും ശ്രദ്ധിക്കണം.
ചിക്കൻ എപ്പോഴും വായു കടക്കാത്ത ഫുഡ്-ഗ്രേഡ് കണ്ടെയ്നറിലോ ഫ്രീസർ ബാഗിലോ അടച്ച് സൂക്ഷിക്കണം. വാങ്ങിയ തീയതിയും ഫ്രീസറിൽ സൂക്ഷിച്ച തീയതിയും പാക്കറ്റിൽ രേഖപ്പെടുത്തുന്നത് ഉപയോഗ സമയപരിധി തിരിച്ചറിയാൻ സഹായിക്കും.
ചിക്കനിൽ നിന്ന് പുറത്തുവരുന്ന നീര് മറ്റ് ഭക്ഷണങ്ങളിലേക്ക് പടരാതിരിക്കാൻ ഫ്രിഡ്ജിന്റെ ഏറ്റവും താഴത്തെ ഷെൽഫിലാണ് ചിക്കൻ വയ്ക്കേണ്ടത്. ഇത് മറ്റ് ഭക്ഷ്യവസ്തുക്കളിലേക്ക് ബാക്ടീരിയ പകരാനുള്ള സാധ്യത കുറയ്ക്കും.
ഫ്രീസറിൽ നിന്ന് എടുത്ത ചിക്കൻ അടുക്കള മേശപ്പുറത്ത് മണിക്കൂറുകളോളം വെച്ച് ഐസ് ഉരുക്കുന്നത് സുരക്ഷിതമായ രീതിയല്ല. പകരം ഫ്രിഡ്ജിനുള്ളിൽ വെച്ച് സാവധാനത്തിൽ ഉരുക്കുകയോ, അടച്ച പാക്കറ്റോടെ തണുത്ത വെള്ളത്തിൽ മുക്കിവെക്കുകയോ, മൈക്രോവേവിലെ ഡിഫ്രോസ്റ്റ് മോഡ് ഉപയോഗിക്കുകയോ ചെയ്യുന്നതാണ് ഉചിതം. ഒരിക്കൽ ഐസ് ഉരുകിയ ചിക്കൻ വീണ്ടും ഫ്രീസറിൽ വയ്ക്കുന്നത് ഒഴിവാക്കണം. ഇത് ഭക്ഷണത്തിന്റെ ഗുണനിലവാരത്തെയും സുരക്ഷയെയും ബാധിച്ചേക്കാം.
ചിക്കനിൽ അസാധാരണമായ ദുർഗന്ധം, ഒട്ടിപ്പിടിക്കുന്ന സ്വഭാവം, നിറവ്യത്യാസം എന്നിവ ശ്രദ്ധയിൽപ്പെട്ടാൽ അത് ഉപയോഗിക്കരുത്. പാചകം ചെയ്യുമ്പോൾ ചിക്കന്റെ ഉൾഭാഗം പൂർണമായും വെന്തിട്ടുണ്ടെന്ന് ഉറപ്പാക്കുന്നതും അത്യാവശ്യമാണ്.
ബൾക്കായി ചിക്കൻ വാങ്ങുന്നവർ അത് ചെറിയ അളവുകളാക്കി പ്രത്യേകം പായ്ക്ക് ചെയ്ത് ഫ്രീസറിൽ സൂക്ഷിക്കുകയും ആവശ്യത്തിന് മാത്രം പുറത്തെടുത്ത് ഉപയോഗിക്കുകയും ചെയ്യുന്നതാണ് ഏറ്റവും സുരക്ഷിതമായ രീതി. ശരിയായ താപനിലയിൽ സൂക്ഷിക്കുകയും ശുചിത്വത്തോടെ കൈകാര്യം ചെയ്യുകയും ചെയ്താൽ മാത്രമേ ചിക്കൻ ആരോഗ്യസുരക്ഷ ഉറപ്പാക്കി ഉപയോഗിക്കാൻ കഴിയൂ.
