പ്രീമിയം ലുക്കിൽ ക്ലാസിക് 350: പുതിയ സിഗ്നേച്ചർ വൈറ്റ് എഡിഷൻ പുറത്തിറക്കി റോയൽ എൻഫീൽഡ്

പ്രമുഖ ഇരുചക്ര വാഹന നിർമ്മാതാക്കളായ റോയൽ എൻഫീൽഡിന്റെ ജനപ്രിയ മോഡലായ ക്ലാസിക് 350-യുടെ പുതിയ 'സിഗ്നേച്ചർ വൈറ്റ് എഡിഷൻ' വിപണിയിലെത്തി. 2.24 ലക്ഷം രൂപയാണ് ഈ മോഡലിന്റെ എക്സ്-ഷോറൂം വില. ക്ലാസിക് 350 നിരയിലെ ഏറ്റവും ഉയർന്ന വേരിയന്റുകളിൽ ഒന്നായാണ് പുതിയ കളർ ഓപ്ഷനോടെയുള്ള ഈ ബൈക്ക് അവതരിപ്പിച്ചിരിക്കുന്നത്.

വേറിട്ട കളർ കോമ്പിനേഷനിലാണ് ഈ മോഡൽ രൂപകൽപ്പന ചെയ്തിരിക്കുന്നത്. പ്രധാനമായും ഫ്യുവൽ ടാങ്കും സൈഡ് പാനലുകളും വെള്ള നിറത്തിലും, അതിനോടൊപ്പം മാറ്റ് കൂട്ടാനായി കറുത്ത വരകളും നൽകിയിരിക്കുന്നു. ഫെൻഡറുകൾ തിളങ്ങുന്ന കറുപ്പ് നിറത്തിലാണ്. പ്രീമിയം ബ്രൗൺ ടൂറിങ് സീറ്റുകൾ, സൈഡ് പാനലിലെ പുതിയ ക്ലാസിക് ലോഗോ, ഫ്യുവൽ ടാങ്കിൽ സ്റ്റെൻസിൽ ശൈലിയിലുള്ള ഡെക്കാൽ, ഇരുവശങ്ങളിലുമുള്ള റോയൽ എൻഫീൽഡ് ബാഡ്ജുകൾ എന്നിവ പുതിയ എഡിഷന്റെ ബാഹ്യ ഭംഗി കൂട്ടുന്നു.

കാഴ്ചയിലെ മാറ്റങ്ങൾക്ക് പുറമെ മികച്ച സാങ്കേതിക സൗകര്യങ്ങളും ഈ മോഡലിൽ ഉൾപ്പെടുത്തിയിട്ടുണ്ട്. അസിസ്റ്റ് ആൻഡ് സ്ലിപ്പർ ക്ലച്ച്, ക്രമീകരിക്കാൻ സാധിക്കുന്ന (Adjustable) ക്ലച്ച്, ബ്രേക്ക് ലിവറുകൾ എന്നിവ ഇതിന്റെ പ്രത്യേകതകളാണ്. കൂടാതെ, യുഎസ്ബി ടൈപ്പ് സി ഫാസ്റ്റ് ചാർജിങ് പോർട്ടും ട്രിപ്പർ പോഡും ബൈക്കിൽ സ്റ്റാൻഡേർഡായി തന്നെ ലഭ്യമാക്കിയിട്ടുണ്ട്.