‘വിരാട് മാതൃകാപരമായ പ്രൊഫഷണൽ’; കോഹ്‍ലിയെ പ്രശംസിച്ച് വിവിഎസ് ലക്ഷ്മൺ

മുംബൈ: മുൻ ഇന്ത്യൻ ക്യാപ്റ്റനും സൂപ്പർ ബാറ്ററുമായ വിരാട് കോഹ്‍ലിയെ പ്രശംസിച്ച് ഇന്ത്യൻ ഇതിഹാസ താരം വിവിഎസ് ലക്ഷ്മൺ. കരിയറിലുടനീളം മികച്ച മാതൃകകൾ തീർത്ത അതുല്യ പ്രതിഭയാണ് കോഹ്‍ലിയെന്നും ഭാവി ക്രിക്കറ്റ് താരങ്ങൾക്ക് മാതൃകയാക്കാവുന്ന മികച്ച റോൾ മോഡലാണ് അദ്ദേഹമെന്നും ബിസിസിഐ സെന്റർ ഓഫ് എക്സലൻസ് മേധാവി കൂടിയായ ലക്ഷ്മൺ പറഞ്ഞു.

കളിക്കാനിറങ്ങുമ്പോഴെല്ലാം ബാറ്റിങ്ങിൽ ഉയർന്ന നിലവാരം നിലനിർത്താൻ കോഹ്‍ലി പുലർത്തിയിരുന്ന അർപ്പണബോധവും പ്രൊഫഷണലിസവുമാണ് ലക്ഷ്മൺ എടുത്തുപറഞ്ഞത്. നിരവധി യുവതാരങ്ങൾ കോഹ്‍ലിയെ മാതൃകയാക്കുന്നതിന് പ്രധാന കാരണം അദ്ദേഹത്തിന്റെ ഈ സമീപനമാണെന്നും അദ്ദേഹം വ്യക്തമാക്കി.


“വിരാട് മാതൃകാപരമായ പ്രൊഫഷണലാണെന്ന കാര്യത്തിൽ സംശയമില്ല. അദ്ദേഹം തനിക്കായി ചില മാനദണ്ഡങ്ങൾ സ്വയം നിശ്ചയിച്ചിട്ടുണ്ട്. എതിർ ടീം ഏതായാലും ആ നിലവാരം നിലനിർത്താനും മാനദണ്ഡങ്ങൾ പാലിക്കാനും അദ്ദേഹം എപ്പോഴും ശ്രദ്ധിക്കാറുണ്ട്. അതുകൊണ്ടാണ് അദ്ദേഹം മികച്ച റോൾ മോഡലാകുന്നത്. ഒട്ടേറെ യുവതാരങ്ങൾ അദ്ദേഹത്തെ അനുകരിക്കാൻ ശ്രമിക്കുന്നതിനും ഇതാണ് കാരണമെന്ന് കരുതുന്നു,” ലക്ഷ്മൺ പറഞ്ഞു.

കോഹ്‍ലിയുടെ ഐതിഹാസിക കരിയറിലെ കണക്കുകളും അദ്ദേഹത്തിന്റെ സ്ഥിരതയും ലക്ഷ്മണിന്റെ വിലയിരുത്തലിന് അടിവരയിടുന്നതാണ്. അന്താരാഷ്ട്ര ക്രിക്കറ്റിൽ 562 മത്സരങ്ങളിൽ നിന്ന് 85 സെഞ്ചുറികളും 148 അർധസെഞ്ചുറികളും ഉൾപ്പെടെ 28,359 റൺസാണ് കോഹ്‍ലി നേടിയിട്ടുള്ളത്. പുറത്താകാതെ നേടിയ 254 റൺസാണ് ഉയർന്ന സ്കോർ.

123 ടെസ്റ്റ് മത്സരങ്ങളിൽ നിന്ന് 46.85 ശരാശരിയിൽ 9,230 റൺസ് നേടിയ കോഹ്‍ലി 30 സെഞ്ചുറികളും സ്വന്തമാക്കിയിട്ടുണ്ട്. ഏകദിനത്തിൽ 314 മത്സരങ്ങളിൽ നിന്ന് 54 സെഞ്ചുറികളും 75 അർധസെഞ്ചുറികളും ഉൾപ്പെടെ 14,941 റൺസാണ് സമ്പാദ്യം.

ഏകദിന ക്രിക്കറ്റിലെ സമാനതകളില്ലാത്ത ബാറ്റിങ് ഇതിഹാസങ്ങളിലൊരാളായാണ് കോഹ്‍ലി വിലയിരുത്തപ്പെടുന്നത്. ടി20യിൽ 125 മത്സരങ്ങളിൽ നിന്ന് ഒരു സെഞ്ചുറിയുൾപ്പെടെ 4,188 റൺസും താരം നേടിയിട്ടുണ്ട്.

മികവിനൊപ്പം ഫിറ്റ്നസ്, അച്ചടക്കം, പ്രൊഫഷണലിസം എന്നിവയ്ക്കും വലിയ പ്രാധാന്യം നൽകുന്ന കോഹ്‍ലിയുടെ സമീപനമാണ് പുതിയ തലമുറയിലെ താരങ്ങൾക്ക് പ്രചോദനമാകുന്നതെന്നാണ് ലക്ഷ്മണിന്റെ വിലയിരുത്തൽ.