യു.എസ്. ഇടക്കാല തിരഞ്ഞെടുപ്പ്: ഇന്ത്യൻ വംശജർക്ക് മികച്ച മുന്നേറ്റം, സുഹാസ് സുബ്രഹ്‌മണ്യവും പ്രമീള ജയപാലും വിജയിച്ചു

വാഷിങ്ടൺ: യു.എസ്. ഇടക്കാല തിരഞ്ഞെടുപ്പിൽ ഇന്ത്യൻ വംശജർക്ക് മികച്ച നേട്ടം. മുൻ യു.എസ്. പ്രസിഡന്റ് ബരാക് ഒബാമയുടെ ഉപദേഷ്ടാവായിരുന്ന സുഹാസ് സുബ്രഹ്‌മണ്യം ജനപ്രതിനിധിസഭയിലേക്ക് വീണ്ടും തിരഞ്ഞെടുക്കപ്പെട്ടു. വിർജീനിയയിലെ പത്താം കോൺഗ്രഷണൽ ജില്ലയിൽനിന്നാണ് 40-കാരനായ സുബ്രഹ്‌മണ്യം വിജയം സ്വന്തമാക്കിയത്. 61 ശതമാനത്തിലധികം വോട്ടുകൾ നേടിയ അദ്ദേഹം റിപ്പബ്ലിക്കൻ സ്ഥാനാർഥി ഡേവ് ബെക്‌വിറ്റിനെയാണ് പരാജയപ്പെടുത്തിയത്. ബെക്‌വിറ്റിന് 36 ശതമാനം വോട്ടുകളാണ് ലഭിച്ചത്. ഇന്ത്യൻ മാതാപിതാക്കൾക്ക് ഹൂസ്റ്റണിൽ ജനിച്ച സുബ്രഹ്‌മണ്യം ന്യൂ ഓർലിയൻസിലെ ടുലെയ്ൻ സർവകലാശാലയിലാണ് വിദ്യാഭ്യാസം പൂർത്തിയാക്കിയത്. തുടർന്ന് നോർത്ത് വെസ്റ്റേൺ സർവകലാശാലയിൽനിന്ന് നിയമബിരുദം നേടിയ അദ്ദേഹം ബരാക് ഒബാമയുടെ വൈറ്റ് ഹൗസിൽ സാങ്കേതികവിദ്യാ നയ ഉപദേഷ്ടാവായും പ്രവർത്തിച്ചിട്ടുണ്ട്.

കേരളത്തിൽ വേരുകളുള്ള പ്രമീള ജയപാൽ വാഷിങ്ടണിലെ ഏഴാം കോൺഗ്രഷണൽ ജില്ലയിൽനിന്ന് 87.47% വോട്ടുകൾ നേടി വലിയ വിജയം സ്വന്തമാക്കി. ആകെ 1,77,700 വോട്ടുകളാണ് അവർ നേടിയത്. റിപ്പബ്ലിക്കൻ സ്ഥാനാർഥി നിരവ് ഷേത്തിന് 12.14 ശതമാനം (24,654 വോട്ടുകൾ) മാത്രമേ നേടാനായുള്ളൂ. ഗുജറാത്തിൽ ജനിച്ച മുൻ യു.എസ്. മറീനാണ് ഷേത്ത്. 2017 മുതൽ ഈ മണ്ഡലത്തെ പ്രതിനിധീകരിക്കുന്ന പ്രമീള ജയപാൽ ജനപ്രതിനിധിസഭയിലേക്ക് തിരഞ്ഞെടുക്കപ്പെട്ട ആദ്യ ഇന്ത്യൻ വംശജയായ വനിതകൂടിയാണ്.

ഫ്ളോറിഡയിലെ 22-ാം കോൺഗ്രഷണൽ ജില്ലയിൽനിന്ന് ഡെമോക്രാറ്റിക് സ്ഥാനാർഥിയായ ഇന്ത്യൻ വംശജ പിയ ദണ്ഡിയയും ജനപ്രതിനിധിസഭയിലേക്ക് തിരഞ്ഞെടുക്കപ്പെട്ടു. മുൻ ഹൈസ്‌കൂൾ പ്രിൻസിപ്പലായ ദണ്ഡിയ 51.9% വോട്ടുകൾ നേടിയാണ് റിപ്പബ്ലിക്കൻ സ്ഥാനാർഥി കേസി അസ്‌കറിനെ പരാജയപ്പെടുത്തിയത്. ഫ്ളോറിഡയിലെ പാം ബീച്ച് കൗണ്ടിയിൽ ജനിച്ചുവളർന്ന അവർ അധ്യാപികയായാണ് ഔദ്യോഗിക ജീവിതം ആരംഭിച്ചത്. പിന്നീട് ന്യൂയോർക്കിലെ ഹാർലെമിൽ ഹൈസ്‌കൂൾ പ്രിൻസിപ്പലായി സേവനം അനുഷ്ഠിച്ചു.

കാലിഫോർണിയയിലെ 17-ാം കോൺഗ്രഷണൽ ജില്ലയിൽനിന്ന് മത്സരിക്കുന്ന ഡെമോക്രാറ്റിക് സ്ഥാനാർഥി റോ ഖന്നയുടെ കാര്യത്തിൽ ഇതുവരെ വ്യക്തമായ ഫലസൂചനകൾ പുറത്തുവന്നിട്ടില്ല. സിലിക്കൺ വാലിയുടെ ചില ഭാഗങ്ങൾ ഉൾപ്പെടുന്ന മണ്ഡലത്തിൽ ഇന്ത്യൻ വംശജനായ സംരംഭകൻ റിതേഷ് ടണ്ടനാണ് അദ്ദേഹത്തിന്റെ എതിരാളി. ജനപ്രതിനിധിസഭയിൽ വീണ്ടും അംഗമാകാനാണ് റോ ഖന്നയുടെ ശ്രമം.

യു.എസിൽ ഗുജറാത്തി മാതാപിതാക്കൾക്ക് ജനിച്ച ഡെമോക്രാറ്റിക് സ്ഥാനാർഥി അമി ബേര കാലിഫോർണിയയിലെ മൂന്നാം കോൺഗ്രഷണൽ ജില്ലയിൽ മുന്നിട്ടുനിൽക്കുന്നു. രാജ്കോട്ടിൽനിന്ന് കുടിയേറിയവരാണ് അദ്ദേഹത്തിന്റെ മാതാപിതാക്കൾ. യു.എസ്. കോൺഗ്രസിലെത്തിയ മൂന്നാമത്തെ ഇന്ത്യൻ വംശജനാണ് അമി ബേര. മണ്ഡലത്തിലെ വോട്ടെണ്ണൽ പുരോഗമിക്കുകയാണെങ്കിലും ഇതുവരെ അന്തിമ ഫലസൂചനകൾ ലഭ്യമായിട്ടില്ല. റിപ്പബ്ലിക്കൻ പാർട്ടി സ്ഥാനാർഥി റോബ് ടക്കറാണ് അദ്ദേഹത്തിന് എതിരായി രംഗത്തുള്ളത്.

അരിസോണയിലെ ഒന്നാം കോൺഗ്രഷണൽ ജില്ലയിൽനിന്ന് മത്സരിക്കുന്ന ഡെമോക്രാറ്റിക് സ്ഥാനാർഥി അമിഷ് ഷാ ശക്തമായ ലീഡോടെ നിലവിൽ മുന്നിലാണ്. ഡോക്ടറും മുൻ സ്റ്റേറ്റ് പ്രതിനിധിയുമായ അദ്ദേഹം റിപ്പബ്ലിക്കൻ സ്ഥാനാർഥി ജെയ് ഫീലിക്കെതിരെയാണ് മത്സരിക്കുന്നത്. മുൻ നാഷണൽ ഫുട്ബോൾ ലീഗ് കിക്കറായ ഫീലിക്ക് ഡൊണാൾഡ് ട്രംപിന്റെ പിന്തുണയുണ്ട്. അരിസോണ നിയമനിർമാണ സഭയിൽ മൂന്ന് തവണ അംഗമായിരുന്ന അമിഷ് ഷാ 2024-ലെ കോൺഗ്രസ് തിരഞ്ഞെടുപ്പിലും മത്സരിച്ചിരുന്നു. അന്ന് റിപ്പബ്ലിക്കൻ സ്ഥാനാർഥി ഡേവിഡ് ഷൈ്വക്കർട്ടിനോട് നേരിയ വോട്ടുകൾക്കാണ് അദ്ദേഹം പരാജയപ്പെട്ടത്.

ടെക്സസിലെ 47-ാം സ്റ്റേറ്റ് ഹൗസ് ജില്ലയിൽനിന്ന് ഡെമോക്രാറ്റിക് സ്ഥാനാർഥിയായി മത്സരിക്കുന്ന പൂജ സേത്തി പ്രമുഖ അഭിഭാഷകയാണ്. ടെക്സസ് നിയമനിർമാണ സഭയിൽ ചീഫ് ഓഫ് സ്റ്റാഫായും അവർ പ്രവർത്തിച്ചിട്ടുണ്ട്. നിലവിൽ ഇവരുടെ മണ്ഡലത്തിലെ തിരഞ്ഞെടുപ്പ് ഫലസൂചനകൾ ഔദ്യോഗികമായി പുറത്തുവന്നിട്ടില്ല.

ടെക്സസിലെ 66-ാം സ്റ്റേറ്റ് ഹൗസ് ജില്ലയിൽനിന്ന് ഡെമോക്രാറ്റിക് സ്ഥാനാർഥിയായി മത്സരിക്കുന്ന സന്ദീപ് ശ്രീവാസ്തവ ആദ്യ ഫലസൂചനകൾ വരുമ്പോൾ പിറകിലാണ്. റിപ്പബ്ലിക്കൻ പാർട്ടി പ്രതിനിധിയായ മാറ്റ് ഷഹീൻ 54 ശതമാനം വോട്ടുകളോടെ മുന്നേറുമ്പോൾ, സന്ദീപിന് 46 ശതമാനം വോട്ടുകളാണ് ഇതുവരെ ലഭിച്ചിട്ടുള്ളത്. വ്യവസായിയും സാമൂഹിക പ്രവർത്തകനുമായ സന്ദീപ് വർഷങ്ങളായി പ്ലാനോ-ഫ്രിസ്‌കോ മേഖലയിലാണ് താമസിക്കുന്നത്. തുടർച്ചയായി അഞ്ചുതവണ ഈ മണ്ഡലത്തെ പ്രതിനിധാനം ചെയ്ത വ്യക്തിയാണ് എതിരാളിയായ റിപ്പബ്ലിക്കൻ സ്ഥാനാർഥി.

ലോസ് ആഞ്ജലീസ് സിറ്റി കൗൺസിൽ അംഗവും നഗരാസൂത്രണ വിദഗ്ധയുമായ നിത്യ രാമൻ ലോസ് ആഞ്ജലീസ് മേയർ സ്ഥാനത്തേക്ക് മത്സരിക്കുന്നുണ്ട്. സിൽവർ ലേക്ക് നെയ്ബർഹുഡ് കൗൺസിലിന്റെ ഭവനരഹിതരുമായി ബന്ധപ്പെട്ട സമിതിയുടെ സഹ അധ്യക്ഷയായി പ്രവർത്തിച്ചിട്ടുള്ള അവർ സെലാ നെയ്ബർഹുഡ് ഹോംലെസ് കോയലിഷന്റെ സഹസ്ഥാപക കൂടിയാണ്. തിരഞ്ഞെടുപ്പിലെ ആദ്യ ഫലസൂചനകൾ പ്രകാരം ഇവർ നിലവിലെ മേയറായ കാരെൻ ബാസിനുമായി നേരിയ വോട്ടുവ്യത്യാസത്തിൽ പിറകിലാണ്. നിത്യ രാമൻ വിജയിച്ചാൽ യു.എസിലെ ഏറ്റവും വലിയ രണ്ട് നഗരങ്ങളായ ന്യൂയോർക്കിലും ലോസ് ആഞ്ജലീസിലും ഇന്ത്യൻ വംശജരായ മേയർമാരുണ്ടാകും. നിലവിൽ ഇന്ത്യൻ വംശജനായ സൊഹ്റാൻ മംദാനിയാണ് ന്യൂയോർക്ക് മേയർ. ലോസ് ആഞ്ജലീസിലും നിത്യ രാമൻ വിജയിച്ചാൽ ഇന്ത്യൻ വംശജർക്ക് ഇത് മറ്റൊരു ചരിത്രനേട്ടമാകും.

കേരളത്തിൽനിന്ന് കുടിയേറിയവരുടെ മകനായ റിപ്പബ്ലിക്കൻ സ്ഥാനാർഥി വിവേക് രാമസ്വാമിക്ക് ഒഹായോ ഗവർണർ തിരഞ്ഞെടുപ്പിൽ പരാജയം നേരിടേണ്ടിവന്നു. യു.എസ്. പ്രസിഡന്റ് ഡൊണാൾഡ് ട്രംപിന്റെ പിന്തുണയോടെ മേയിൽ നടന്ന റിപ്പബ്ലിക്കൻ പ്രൈമറിയിൽ വിജയിച്ച രാമസ്വാമി ഡെമോക്രാറ്റിക് സ്ഥാനാർഥി ആമി ആക്ടണോടാണ് പരാജയപ്പെട്ടത്. രണ്ടുലക്ഷത്തിലധികം വോട്ടുകളുടെ ഭൂരിപക്ഷത്തിനായിരുന്നു ആക്ടന്റെ വിജയം. ഡോക്ടറായ ആമി ആക്ടന്റെ വിജയത്തോടെ 2006-നുശേഷം ആദ്യമായി ഒഹായോയിൽ ഡെമോക്രാറ്റിക് പാർട്ടിക്ക് ഗവർണർ സ്ഥാനം ലഭിച്ചു.