യു.എസ് - ഇറാൻ യുദ്ധം ഉടൻ അവസാനിക്കും; നയം വ്യക്തമാക്കി ഡൊണാൾഡ് ട്രംപ്

വാഷിങ്ടൺ: യു.എസും ഇറാനും തമ്മിലുള്ള നിലവിലെ യുദ്ധം ഉടൻ അവസാനിക്കുമെന്ന് പ്രതീക്ഷിക്കുന്നതായി യു.എസ്. പ്രസിഡന്റ് ഡൊണാൾഡ് ട്രംപ്. എന്നാൽ, യുദ്ധം അവസാനിപ്പിക്കുന്നതുമായി ബന്ധപ്പെട്ട വ്യക്തമായ പ്ലാനുകളോ സൂചനകളോ നൽകാൻ അദ്ദേഹം തയ്യാറായില്ല. നവംബർ മൂന്നിന് നടക്കാനിരിക്കുന്ന ഇടക്കാല കോൺഗ്രസ് തിരഞ്ഞെടുപ്പിന് മുന്നോടിയായി നൽകിയ പ്രത്യേക അഭിമുഖത്തിൽ സംസാരിക്കുകയായിരുന്നു അദ്ദേഹം.

ഇറാൻ ഇനി ഒരിക്കലും ആണവായുധം നിർമിക്കില്ലെന്ന ഉറപ്പ് യു.എസിന് ആവശ്യമാണെന്ന് ട്രംപ് പറഞ്ഞു. കൻസാസ് സിറ്റിയിലെ കെ.സി.എം.ഒ. റേഡിയോ സ്റ്റേഷന് നൽകിയ അഭിമുഖത്തിലാണ് അദ്ദേഹം നിലപാട് വ്യക്തമാക്കിയത്. വരാനിരിക്കുന്ന തിരഞ്ഞെടുപ്പിന് മുൻപായി ഇറാനെതിരേ യു.എസ്. പുതിയ ആക്രമണങ്ങൾ നടത്തില്ലെന്ന് ട്രംപ് മുൻപേ വ്യക്തമാക്കിയിരുന്നു. ഇറാൻ ആണവായുധം വികസിപ്പിക്കില്ലെന്ന ഉറപ്പാണ് തങ്ങളുടെ പ്രധാന ആവശ്യമെന്നും അദ്ദേഹം അഭിമുഖത്തിൽ ആവർത്തിച്ചു.