വാഷിംഗ്ടണ്‍/ടെഹ്‌റാന്‍: എട്ട് മാസത്തോളമായി തുടരുന്ന യുഎസ്-ഇസ്രായേല്‍ - ഇറാന്‍ സംഘര്‍ഷം കൂടുതല്‍ വഷളാകുന്നു. ഇറാനെതിരെ വരുംദിവസങ്ങളില്‍ വീണ്ടും സൈനിക നടപടി ഉണ്ടാകുമെന്ന സൂചന നല്‍കി യുഎസ് പ്രസിഡന്റ് ഡൊണാള്‍ഡ് ട്രംപ്. യുഎസ് സംഘര്‍ഷം പെട്ടെന്ന് അവസാനിപ്പിച്ചേക്കാമെന്നും അതല്ലെങ്കില്‍ ആക്രമണം ഘട്ടംഘട്ടമായി കുറച്ചുകൊണ്ടുവരുമെന്നും ട്രംപ് മാധ്യമങ്ങളോട് വ്യക്തമാക്കി. എന്നാല്‍ നവംബറില്‍ നടക്കുന്ന അമേരിക്കന്‍ ഇടക്കാല തെരഞ്ഞെടുപ്പിന് ശേഷം ഇറാന്റെ ഊര്‍ജ്ജ-ആറ്റോമിക് നിലയങ്ങളും മിസൈല്‍ കേന്ദ്രങ്ങളും ലക്ഷ്യമിട്ട് വീണ്ടും ആക്രമണം ശക്തമാക്കാന്‍ അമേരിക്കയും ഇസ്രായേലും പദ്ധതിയിടുന്നതായി റിപ്പോര്‍ട്ടുകളുണ്ട്.
അതേസമയം, അമേരിക്കയോ ഇസ്രായേലോ വീണ്ടും സൈനിക ആക്രമണം അഴിച്ചുവിട്ടാല്‍ ഗള്‍ഫ് മേഖലയിലെ നിര്‍ണായകമായ കടലിനടിയിലെ വാര്‍ത്താവിനിമയ കേബിളുകള്‍ ആക്രമിച്ചു തകര്‍ക്കുമെന്ന് ഇറാന്‍ മുന്നറിയിപ്പ് നല്‍കി. ഹോര്‍മുസ് കടലിടുക്കിലൂടെ കടന്നുപോകുന്ന പ്രധാന ഇന്റര്‍നെറ്റ് കേബിളുകളും ഗള്‍ഫ് മേഖലയിലെ യുഎസ് വികേന്ദ്രീകൃത ഡാറ്റാ സെന്ററുകളും ലക്ഷ്യമിടുമെന്ന് ഇറാന്‍ റെവല്യൂഷണറി ഗാര്‍ഡ് വക്താക്കള്‍ വ്യക്തമാക്കി.
പുതിയ സൈനിക നീക്കം മേഖലയെ ആകെ കടുത്ത പ്രത്യാഘാതങ്ങളിലേക്ക് തള്ളിയിടുമെന്ന് ഫ്രാന്‍സ്, തുര്‍ക്കി, ജര്‍മ്മനി എന്നീ രാജ്യങ്ങളുടെ വിദേശകാര്യ മന്ത്രിമാര്‍ മുന്നറിയിപ്പ് നല്‍കി. സംഘര്‍ഷം രൂക്ഷമാകുന്നത് ആഗോള എണ്ണവില കുത്തനെ ഉയരുന്നതിനും അന്താരാഷ്ട്ര സാമ്പത്തിക തകര്‍ച്ചയ്ക്കും കാരണമാകുമെന്നും ഡിപ്ലോമാറ്റിക് ചര്‍ച്ചകളിലൂടെ മാത്രമാണ് പ്രശ്‌നപരിഹാരം സാധ്യമാകുകയെന്നും ഇസ്താംബൂളില്‍ ചേര്‍ന്ന നയതന്ത്ര യോഗത്തില്‍ നേതാക്കള്‍ അഭിപ്രായപ്പെട്ടു.
ഇറാനെതിരെ വീണ്ടും സൈനിക നടപടി; മുന്നറിയിപ്പുമായി ട്രംപ്
Jaihind TV News Report
Jaihind TV Web Desk
2 min read
364 reads
