ഇടുക്കി: ആറുമാസം മാത്രം പ്രായമുള്ള സ്വന്തം കുഞ്ഞിനെ രണ്ടര ലക്ഷം രൂപയ്ക്ക് വില്‍ക്കാന്‍ ശ്രമിച്ച കേസില്‍ മാതാപിതാക്കളും ഇടനിലക്കാരനും ഉള്‍പ്പെടെ അസം സ്വദേശികളായ മൂന്നുപേര്‍ പോലീസിന്റെ പിടിയിലായി. കുട്ടിയുടെ മാതാപിതാക്കളായ പ്രദീപ് ദാസ്, ഭാര്യ സിമ ദാസ്, ഇടനിലക്കാരനായ ജാഡു ഗൊഗോയ് എന്നിവരെയാണ് കട്ടപ്പന പോലീസ് അറസ്റ്റ് ചെയ്തത്.
ഇടുക്കി കട്ടപ്പനയില്‍ വെച്ച് ഇവര്‍ കുഞ്ഞിനെ വില്‍പ്പന നടത്താന്‍ ശ്രമിക്കുന്നതായി പോലീസ് രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തില്‍ ഇടുക്കി ജില്ലാ പോലീസ് മേധാവി ഡോ. എ. നസീം ഐ.പി.എസ് നല്‍കിയ നിര്‍ദേശപ്രകാരമാണ് കട്ടപ്പന പോലീസ് അതിവേഗം ഇടപെട്ട് പ്രതികളെ വലയിലാക്കിയത്.
പോലീസ് സംരക്ഷണയിലാക്കിയ കുഞ്ഞിന് ആവശ്യമായ പരിചരണവും സുരക്ഷയും ഉറപ്പാക്കിയിട്ടുണ്ട്. പ്രതികള്‍ക്കെതിരെ ശിശു സംരക്ഷണ നിയമപ്രകാരമടക്കം കടുത്ത നിയമനടപടികള്‍ സ്വീകരിച്ച് കോടതിയില്‍ ഹാജരാക്കി റിമാന്‍ഡ് ചെയ്തു.
ആറുമാസം പ്രായമുള്ള കുഞ്ഞിനെ രണ്ടര ലക്ഷത്തിന് വിൽക്കാൻ ശ്രമം; മാതാപിതാക്കളും ഇടനിലക്കാരനും കട്ടപ്പനയിൽ അറസ്റ്റിൽ
Jaihind TV News Report
Jaihind TV Web Desk
1 min read
126 reads
