അന്താരാഷ്ട്ര ടി20 ലോകകപ്പിൽ വിരാട് കോലിയുടെ 12 വർഷം പഴക്കമുള്ള റെക്കോർഡ് പഴങ്കഥയാക്കി മലയാളി താരം സഞ്ജു സാംസൺ. ഒരു ലോകകപ്പ് പതിപ്പിൽ ഏറ്റവും കൂടുതൽ റൺസ് നേടുന്ന ഇന്ത്യൻ താരമെന്ന നേട്ടമാണ് സഞ്ജു സ്വന്തമാക്കിയത്. 2014-ൽ വിരാട് കോലി നേടിയ 319 റൺസായിരുന്നു നിലവിലെ റെക്കോർഡ്. ന്യൂസിലൻഡിനെതിരായ ഫൈനലിലെ 89 റൺസ് പ്രകടനത്തോടെ അഞ്ച് ഇന്നിങ്‌സുകളിൽ നിന്ന് 321 റൺസ് അടിച്ചുകൂട്ടിയാണ് സഞ്ജു കോലിയെ മറികടന്നത്.
ഈ ലോകകപ്പിൽ ഏറ്റവുമധികം റൺസ് നേടിയ ഇന്ത്യൻ താരങ്ങളുടെ പട്ടികയിൽ സഞ്ജു ഒന്നാമതെത്തി. ഒമ്പത് മത്സരങ്ങളിൽ നിന്ന് 317 റൺസ് നേടിയ ഇഷാൻ കിഷനാണ് രണ്ടാം സ്ഥാനത്ത്. 199.37 എന്ന അമ്പരപ്പിക്കുന്ന സ്‌ട്രൈക്ക് റേറ്റിലും 80.25 ശരാശരിയിലുമാണ് സഞ്ജു ബാറ്റ് ചെയ്തത്. കേവലം അഞ്ച് ഇന്നിങ്‌സുകളിൽ നിന്ന് മൂന്ന് അർധസെഞ്ച്വറികളും 24 സിക്സറുകളും താരം സ്വന്തമാക്കി. ക്യാപ്റ്റൻ സൂര്യകുമാർ യാദവാണ് 242 റൺസുമായി റൺവേട്ടക്കാരിൽ മൂന്നാമത്.
ഈ ലോകകപ്പിലെ റൺവേട്ടക്കാരുടെ മൊത്തത്തിലുള്ള പട്ടികയിൽ പാകിസ്ഥാന്റെ സാഹിബ്സാദ ഫർഹാൻ (383 റൺസ്) മാത്രമാണ് സഞ്ജുവിന് മുന്നിലുള്ളത്. ലോകകപ്പ് ചരിത്രത്തിൽ ഒരു എഡിഷനിൽ ഏറ്റവും കൂടുതൽ റൺസ് നേടിയ മുൻനിര താരങ്ങൾക്കൊപ്പം (ദിൽഷൻ, ബാബർ അസം, ജയവർധനെ) ഇപ്പോൾ സഞ്ജുവിന്റെ പേരും ഇടംപിടിച്ചിരിക്കുന്നു. ഈ നേട്ടത്തോടെ അന്താരാഷ്ട്ര ക്രിക്കറ്റിൽ താൻ എത്രത്തോളം കരുത്തുറ്റ ബാറ്റ്‌സ്മാനാണ് എന്ന് തെളിയിക്കാൻ മലയാളി താരത്തിന് സാധിച്ചു.
