മന്ത്രിസഭയിലെ 'സീനിയർ കരുത്ത്'; മൂന്നാംവട്ടം മന്ത്രിപദവിയിൽ രമേശ് ചെന്നിത്തല; ദൈവനാമത്തിൽ സത്യപ്രതിജ്ഞ ചെയ്ത് അധികാരമേറ്റു

Jaihind TV Web Desk

May 18, 2026

1 min read • Updated: June 02, 2026

മന്ത്രിസഭയിലെ 'സീനിയർ കരുത്ത്'; മൂന്നാംവട്ടം മന്ത്രിപദവിയിൽ രമേശ് ചെന്നിത്തല; ദൈവനാമത്തിൽ സത്യപ്രതിജ്ഞ ചെയ്ത് അധികാരമേറ്റു

പുതിയ യു.ഡി.എഫ് മന്ത്രിസഭയിൽ ആഭ്യന്തരമന്ത്രിയായി മുതിർന്ന കോൺഗ്രസ് നേതാവ് രമേശ് ചെന്നിത്തല സത്യപ്രതിജ്ഞ ചെയ്ത് അധികാരമേറ്റു. തിരുവനന്തപുരം സെൻട്രൽ സ്റ്റേഡിയത്തിൽ നടന്ന പ്രൗഢഗംഭീരമായ ചടങ്ങിൽ ദൈവനാമത്തിലാണ് അദ്ദേഹം പ്രതിജ്ഞ ചൊല്ലിയത്. വി.ഡി. സതീശൻ മന്ത്രിസഭയിലെ ഏറ്റവും സീനിയറായ മുഖങ്ങളിൽ ഒന്നായ രമേശ് ചെന്നിത്തലയ്ക്ക് ഇത് മന്ത്രിപദവിയിലേക്കുള്ള മൂന്നാം ഊഴമാണ്.

ദീർഘകാലത്തെ പാർലമെന്ററി പ്രവർത്തന പരിചയമുള്ള രമേശ് ചെന്നിത്തല ഇത് രണ്ടാം തവണയാണ് സംസ്ഥാനത്തിന്റെ ആഭ്യന്തര മന്ത്രി പദവിയിലേക്ക് എത്തുന്നത്. മുൻപ് ഉമ്മൻചാണ്ടി മന്ത്രിസഭയുടെ കാലത്തും അദ്ദേഹം വിജയകരമായി ആഭ്യന്തര വകുപ്പ് കൈകാര്യം ചെയ്തിരുന്നു. കെ.പി.സി.സി പ്രസിഡന്റ്, പ്രതിപക്ഷ നേതാവ്, ജനപ്രതിനിധി എന്നീ നിലകളിലെല്ലാം മികച്ച പ്രവർത്തനം കാഴ്ചവെച്ച അദ്ദേഹത്തിന്റെ അനുഭവസമ്പത്ത് പുതിയ സർക്കാരിന് വലിയ കരുത്താകും.

സംസ്ഥാനത്തിന്റെ ക്രമസമാധാന ചുമതലയുള്ള നിർണായകമായ ആഭ്യന്തര വകുപ്പ് വീണ്ടും രമേശ് ചെന്നിത്തലയുടെ കൈകളിൽ എത്തുമ്പോൾ വലിയ പ്രതീക്ഷയിലാണ് അണികളും പൊതുജനങ്ങളും. പോലീസിന്റെ നവീകരണത്തിനും വിട്ടുവീഴ്ചയില്ലാത്ത ക്രമസമാധാന പരിപാലനത്തിനും മുൻഗണന നൽകുന്ന അദ്ദേഹത്തിന്റെ ശൈലി യു.ഡി.എഫ് സർക്കാരിന്റെ പ്രതിച്ഛായ ഉയർത്തുമെന്നാണ് വിലയിരുത്തപ്പെടുന്നത്.