ലഹരിക്കെതിരെ കൈകോര്‍ത്ത് കേരളവും തമിഴ്നാടും; 'ഓപ്പറേഷന്‍ തൂഫാന്' പിന്തുണയുമായി മുഖ്യമന്ത്രി വിജയ് കൊച്ചിയിലേക്ക്; ആഭ്യന്തര മന്ത്രിയ്ക്ക് ഉറപ്പ് നല്‍കി

കൊച്ചി: സംസ്ഥാനത്തെ ലഹരി മാഫിയയെ വേരോടെ പിഴുതെറിയാന്‍ ആഭ്യന്തര വകുപ്പ് ആവിഷ്‌കരിച്ച 'ഓപ്പറേഷന്‍ തൂഫാന്‍' പദ്ധതിക്ക് തമിഴ്നാട് സര്‍ക്കാരിന്റെ പൂര്‍ണ്ണ പിന്തുണ. പദ്ധതിയുടെ ഭാഗമായുള്ള ലഹരിവിരുദ്ധ ബോധവല്‍ക്കരണ പരിപാടികളില്‍ പങ്കാളിയാകാന്‍ തമിഴ്നാട് മുഖ്യമന്ത്രി സി. ജോസഫ് വിജയ് കൊച്ചിയിലെത്തും. സംസ്ഥാന ആഭ്യന്തര മന്ത്രി രമേശ് ചെന്നിത്തല ചെന്നൈയിലെത്തി തമിഴ്നാട് മുഖ്യമന്ത്രിയുമായി നടത്തിയ കൂടിക്കാഴ്ചയിലാണ് നിര്‍ണായക തീരുമാനം.

പോലീസും എക്‌സൈസും ചേര്‍ന്ന് വിദ്യാഭ്യാസം, ആരോഗ്യം എന്നീ വകുപ്പുകളുടെ ഏകോപനത്തോടെയാണ് കേരളത്തില്‍ 'ഓപ്പറേഷന്‍ തൂഫാന്‍' നടപ്പിലാക്കുന്നത്. പദ്ധതിക്ക് എല്ലാവിധ പിന്തുണയും പ്രഖ്യാപിച്ച തമിഴ്നാട് മുഖ്യമന്ത്രി, ലഹരിക്കെതിരെയുള്ള പോരാട്ടത്തില്‍ കേരള പോലീസിനൊപ്പം തമിഴ്നാട് പോലീസും സംയുക്തമായി സഹകരിച്ച് പ്രവര്‍ത്തിക്കുമെന്നും ഉറപ്പുനല്‍കി. ഇരുസംസ്ഥാനങ്ങളിലെയും ആഭ്യന്തര-പോലീസ് മേധാവിമാരുടെ ഈ സംയുക്ത നീക്കം അതിര്‍ത്തി കടന്നുള്ള ലഹരിക്കടത്ത് തടയുന്നതില്‍ വലിയ വഴിത്തിരിവാകും.