ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജി വെക്കണമെന്ന് ആവശ്യപ്പെട്ട് ഡൽഹിയിൽ യുവാക്കൾ നടത്തുന്ന സമരത്തിന് പൂർണ പിന്തുണയുമായി രാഹുൽ ഗാന്ധി. നരേന്ദ്ര മോദിയും അമിത് ഷായും ഭീരുക്കളാണെന്നും രാജ്യത്തെ യുവാക്കളെ ഓർത്ത് അഭിമാനിക്കുന്നുവെന്നും രാഹുല്‍ ഗാന്ധി പറഞ്ഞു. ഒപ്പമുണ്ടെന്നും സമരം ശക്തമായി തുടരണമെന്നും രാഹുൽ ആവശ്യപ്പെട്ടു.
"പ്രധാനമന്ത്രി നരേന്ദ്ര മോദിക്കും ആർഎസ്എസിനുമെതിരെ ഒരു ദശാബ്ദത്തിലേറെയായി ഞാൻ പോരാട്ടം നടത്തിവരികയാണ്. അവരുടെ ഉള്ളും പുറവും എനിക്കറിയാം. ഈ ആളുകളുടെ പ്രധാന സ്വഭാവം ഭീരുത്വമാണ്. നരേന്ദ്രമോദി, അമിത് ഷാ, മോഹൻ ഭാഗവത്, ഗ്യാനേഷ് കുമാർ, അജിത് ഡോവൽ എന്നിവരാണ് ഈ കഥയിലെ വില്ലന്മാർ. അവർക്ക് ചുറ്റുമുള്ള ഇടം ചുരുങ്ങിക്കൊണ്ടിരിക്കുകയാണ്; നമ്മൾ ആ ഇടങ്ങൾ അടച്ചുകൊണ്ടിരിക്കുകയാണ്" - സോഷ്യൽ മീഡിയയിൽ പങ്കുവെച്ച വീഡിയോയിൽ രാഹുല്‍ ഗാന്ധി പറഞ്ഞു.
ഭരണഘടനയെയും ഇന്ത്യയിലെ ജനങ്ങളുടെ ശബ്ദത്തെയും സംരക്ഷിക്കാനായി ഏതറ്റം വരെയും പോകുമെന്ന് രാഹുല്‍ ഗാന്ധി വ്യക്തമാക്കി. ഭരണഘടനയെ ആക്രമിച്ച മോദി ഭരണകൂടത്തെ പരാജയപ്പെടുത്തുക തന്നെ ചെയ്യും. പോലീസിനെ ഉപയോഗിച്ച് എത്ര അടിച്ചമർത്താന്‍ ശ്രമിച്ചാലും ഗ്യാനേഷ് കുമാറിനെതിരായ സമരത്തില്‍ നിന്ന് ഒരിഞ്ച് പിന്നോട്ട് പോകില്ലെന്നും രാഹുല്‍ ഗാന്ധി വീഡിയോ സന്ദേശത്തില്‍ വ്യക്തമാക്കി.
