ടെല്‍ അവീവ്: ഇസ്രായേലില്‍ നടന്ന പാര്‍ലമെന്റ് തിരഞ്ഞെടുപ്പിന് പിന്നാലെ പുതിയ സര്‍ക്കാര്‍ രൂപീകരണത്തില്‍ പ്രധാനമന്ത്രി ബെഞ്ചമിന്‍ നെതന്യാഹുവിനെ പിന്നിലാക്കി പ്രതിപക്ഷ നേതാവും മുന്‍ സൈനിക മേധാവിയുമായ ഗാദി ഐസന്‍കോട്ടെ മുന്നേറുന്നു. 120 അംഗ നെസറ്റില്‍ 67 എം.പിമാരുടെ പിന്തുണയോടെയാണ് 'യാഷാര്‍' പാര്‍ട്ടി തലവനായ ഐസന്‍കോട്ടെ പിന്തുണ ഉറപ്പിച്ചത്. നെതന്യാഹുവിന് 46 അംഗങ്ങളുടെ പിന്തുണ മാത്രമാണുള്ളത്.
ഒക്ടോബര്‍ 27-ന് നടന്ന തിരഞ്ഞെടുപ്പില്‍ ഒരു മുന്നണിക്കും വ്യക്തമായ ഭൂരിപക്ഷം ലഭിച്ചിരുന്നില്ല. തുടര്‍ന്ന് പ്രസിഡന്റ് ഐസക് ഹെര്‍സോഗ് നടത്തിയ ചര്‍ച്ചകളിലാണ് ഭൂരിപക്ഷം കക്ഷികളും ഐസന്‍കോട്ടെയ്ക്ക് പിന്തുണ പ്രഖ്യാപിച്ചത്. സര്‍ക്കാരുണ്ടാക്കാന്‍ ആരെ ക്ഷണിക്കുമെന്ന കാര്യത്തില്‍ ഞായറാഴ്ച ഔദ്യോഗിക പ്രഖ്യാപനമുണ്ടാകുമെന്ന് പ്രസിഡന്റ് അറിയിച്ചു. തിരഞ്ഞെടുപ്പില്‍ നെതന്യാഹുവിന്റെ സഖ്യത്തിന് വന്‍ തിരിച്ചടിയാണ് നേരിട്ടത്. മുന്‍പ് 68 സീറ്റുകളുണ്ടായിരുന്ന ഭരണസഖ്യത്തിന് ഇത്തവണ 53 സീറ്റുകള്‍ മാത്രമേ നേടാനായുള്ളൂ. അതേസമയം, ഐസന്‍കോട്ടെയുടെ നേതൃത്വത്തിലുള്ള സിയോണിസ്റ്റ് പാര്‍ട്ടികളുടെ 'ചേഞ്ച്' ബ്ലോക്ക് 48 സീറ്റുകള്‍ നേടി.
ഇത്തവണ ആകെ 19 സീറ്റുകള്‍ നേടിയ ഇസ്രായേലി അറബ്-ഫലസ്തീന്‍ പാര്‍ട്ടികളാണ് സര്‍ക്കാര്‍ രൂപീകരണത്തില്‍ നിര്‍ണ്ണായക ശക്തിയായത്. 11 സീറ്റുകള്‍ നേടിയ ജോയിന്റ് ലിസ്റ്റും 8 സീറ്റുകള്‍ നേടിയ തീവ്ര യാഥാസ്ഥിതിക ഇസ്ലാമിക് പാര്‍ട്ടിയായ റാഅമും ഐസന്‍കോട്ടെയ്ക്ക് പിന്തുണ നല്‍കിയതാണ് അദ്ദേഹത്തിന് മേല്‍ക്കൈ നല്‍കിയത്. സാധാരണയായി നെതന്യാഹുവിനെ പിന്തുണയ്ക്കാറുള്ള യുണൈറ്റഡ് തോറ ജൂഡായിസം ഇത്തവണ ഇരുവര്‍ക്കും പിന്തുണ പ്രഖ്യാപിച്ചില്ല.
ഇസ്രായേലിന്റെ അടിസ്ഥാന നിയമങ്ങള്‍ അനുസരിച്ച് സര്‍ക്കാര്‍ രൂപീകരണത്തിന് മാസങ്ങള്‍ എടുത്തേക്കാം. പുതിയ സര്‍ക്കാര്‍ അധികാരമേല്‍ക്കുന്നത് വരെ നെതന്യാഹു കാവല്‍ പ്രധാനമന്ത്രിയായി തുടരും. ഒരു മുന്നണിക്കും ഭൂരിപക്ഷം തികയ്ക്കാന്‍ സാധിച്ചില്ലെങ്കില്‍ രാജ്യം വീണ്ടുമൊരു പൊതുതിരഞ്ഞെടുപ്പിലേക്ക് നീങ്ങും.
പ്രതിപക്ഷ സഖ്യത്തിന് 67 സീറ്റ്; ഇസ്രയേലില്‍ ഗാദി ഐസന്‍കോട്ട് അധികാരത്തിലേക്ക്; നെതന്യാഹുവിന് 46 പേരുടെ പിന്തുണ മാത്രം
Jaihind TV News Report
Jaihind TV Web Desk
2 min read
248 reads
