കാറിന്റെ മൈലേജ് പെട്ടെന്ന് കുറയുന്നുണ്ടോ? ഇന്ധനം മാത്രമല്ല, ഈ കാര്യങ്ങളും പരിശോധിക്കണം

കാറിന്റെ മൈലേജ് പെട്ടെന്ന് കുറഞ്ഞതായി ശ്രദ്ധയിൽപ്പെട്ടിട്ടുണ്ടോ? പലരും ഇതിന് കാരണം പെട്രോളിന്റെ ഗുണനിലവാരക്കുറവാണെന്ന് കരുതാറുണ്ട്. എഥനോൾ കലർന്ന ഇന്ധനം ചില സാഹചര്യങ്ങളിൽ ഇന്ധനക്ഷമതയെ ബാധിക്കാമെങ്കിലും, മൈലേജ് കുറയാൻ ഇതുമാത്രമല്ല കാരണം. വാഹനത്തിന്റെ പരിപാലനത്തിലെ ചില പിഴവുകളും ഡ്രൈവിംഗ് ശീലങ്ങളുമെല്ലാം മൈലേജ് കുറയുന്നതിന് കാരണമാകാം.

ടയർ പ്രഷർ കുറയുന്നത് ഇന്ധന ഉപഭോഗം വർധിപ്പിക്കും - കാറിന്റെ നാല് ടയറുകളിലും ആവശ്യമായ വായുസമ്മർദ്ദം ഇല്ലെങ്കിൽ റോഡുമായുള്ള ഘർഷണം വർധിക്കും. ഇതുമൂലം വാഹനം മുന്നോട്ട് നീക്കാൻ എഞ്ചിന് കൂടുതൽ ശക്തി പ്രയോഗിക്കേണ്ടിവരും. സ്വാഭാവികമായും ഇന്ധന ഉപഭോഗം കൂടുകയും മൈലേജ് കുറയുകയും ചെയ്യും. അതിനാൽ നിർമാതാവ് നിർദേശിച്ചിരിക്കുന്ന അളവിൽ ടയർ പ്രഷർ നിലനിർത്തുന്നത് പ്രധാനമാണ്.

അഴുക്കുപിടിച്ച എയർ ഫിൽറ്റർ മൈലേജിനെ ബാധിക്കും -എഞ്ചിന്റെ പ്രവർത്തനത്തിന് ആവശ്യമായ വായു ലഭ്യമാക്കുന്നതിൽ എയർ ഫിൽറ്ററിന് നിർണായക പങ്കുണ്ട്. എയർ ഫിൽറ്ററിൽ പൊടിയും അഴുക്കും അടിഞ്ഞുകൂടി അടഞ്ഞാൽ എഞ്ചിനിലേക്ക് ആവശ്യത്തിന് വായു എത്തില്ല. വായുവിന്റെയും ഇന്ധനത്തിന്റെയും ശരിയായ അനുപാതം നഷ്ടപ്പെടുന്നതോടെ ഇന്ധന ഉപഭോഗം വർധിക്കുകയും മൈലേജ് കുറയുകയും ചെയ്യും.

അമിതഭാരവും എ.സി ഉപയോഗവും ശ്രദ്ധിക്കണം -കാറിൽ അനാവശ്യമായി കൂടുതൽ സാധനങ്ങൾ സൂക്ഷിക്കുന്നതും മൈലേജിനെ ബാധിക്കും. വാഹനത്തിന്റെ ഭാരം കൂടുമ്പോൾ അത് നീക്കാൻ എഞ്ചിന് കൂടുതൽ ഊർജം ആവശ്യമായി വരും. അതുപോലെ ദീർഘനേരം എ.സി പ്രവർത്തിപ്പിക്കുന്നതും ഇന്ധന ഉപഭോഗം വർധിപ്പിക്കാം. പ്രത്യേകിച്ച് വാഹനം നിർത്തിയിട്ടിരിക്കുമ്പോൾ ആവശ്യകതയില്ലാതെ എ.സി ഉപയോഗിക്കുന്നത് ഒഴിവാക്കുന്നതാണ് നല്ലത്.

സ്പാർക്ക് പ്ലഗിന്റെ തകരാറും കാരണമാകാം -പഴകിയതോ അഴുക്കുപിടിച്ചതോ ആയ സ്പാർക്ക് പ്ലഗുകൾ ഇന്ധനം കൃത്യമായി കത്തിക്കുന്നതിനെ ബാധിക്കും. ഇതുമൂലം എഞ്ചിന്റെ കാര്യക്ഷമത കുറയുകയും കൂടുതൽ ഇന്ധനം ഉപയോഗിക്കേണ്ട സാഹചര്യം ഉണ്ടാകുകയും ചെയ്യും. അതിനാൽ കൃത്യമായ ഇടവേളകളിൽ സ്പാർക്ക് പ്ലഗുകൾ പരിശോധിക്കുകയും ആവശ്യമായാൽ മാറ്റുകയും വേണം.

എഞ്ചിൻ ഓയിൽ സമയത്ത് മാറ്റണം -എഞ്ചിൻ ഓയിൽ കൃത്യസമയത്ത് മാറ്റാത്തതും മൈലേജ് കുറയാനുള്ള പ്രധാന കാരണങ്ങളിലൊന്നാണ്. പഴകിയതോ വാഹനത്തിന് അനുയോജ്യമല്ലാത്തതോ ആയ ഓയിൽ ഉപയോഗിച്ചാൽ എഞ്ചിനുള്ളിലെ ഘർഷണം വർധിക്കും. ഇതോടെ എഞ്ചിന് കൂടുതൽ ജോലി ചെയ്യേണ്ടിവരുകയും ഇന്ധന ഉപഭോഗം കൂടുകയും ചെയ്യും.

കാറിന്റെ മൈലേജ് നിലനിർത്താൻ കൃത്യമായ സർവീസ്, ടയർ പരിപാലനം, ഗുണമേന്മയുള്ള ഇന്ധന ഉപയോഗം, ശരിയായ ഡ്രൈവിംഗ് ശീലങ്ങൾ എന്നിവ ഏറെ പ്രധാനമാണ്. മൈലേജ് കുറയുന്നത് ശ്രദ്ധയിൽപ്പെട്ടാൽ ആദ്യം വാഹനത്തിന്റെ അടിസ്ഥാന ഘടകങ്ങൾ പരിശോധിക്കുന്നത് ഉചിതമാണ്.