നിലവിൽ സൺറൈസേഴ്സ് ഹൈദരാബാദാണ് പട്ടികയിൽ ഒന്നാമത്. 11 മത്സരങ്ങളിൽ നിന്ന് 14 പോയിന്റുള്ള അവർക്ക് ബാക്കിയുള്ള മൂന്ന് കളികളിൽ ഒന്നിൽ മാത്രം വിജയിച്ചാൽ പ്ലേഓഫ് ഉറപ്പിക്കാം. രണ്ടാം സ്ഥാനത്തുള്ള പഞ്ചാബ് കിങ്സിന് (13 പോയിന്റ്) ശേഷിക്കുന്ന നാല് മത്സരങ്ങളിൽ രണ്ടെണ്ണം ജയിച്ചാൽ അടുത്ത ഘട്ടത്തിലേക്ക് കടക്കാം. 12 പോയിന്റ് വീതമുള്ള റോയൽ ചാലഞ്ചേഴ്സ് ബെംഗളൂരു, രാജസ്ഥാൻ റോയൽസ്, ഗുജറാത്ത് ടൈറ്റൻസ് എന്നീ ടീമുകൾക്കും നാല് മത്സരങ്ങൾ ബാക്കിയുണ്ട്. ഇതിൽ രണ്ടെണ്ണത്തിൽ വിജയിച്ചാൽ ഇവർക്കും 16 പോയിന്റിലെത്താം. 10 പോയിന്റുള്ള ചെന്നൈ സൂപ്പർ കിങ്സിന് പ്ലേഓഫ് ഉറപ്പാക്കാൻ ശേഷിക്കുന്ന നാല് മത്സരങ്ങളിൽ മൂന്നെണ്ണം വിജയിക്കേണ്ടതുണ്ട്.
പ്രതീക്ഷ കൈവിടാതെ കൊൽക്കത്തയും അടിത്തട്ടിലുള്ളവരും
നിലവിൽ 9 പോയിന്റുള്ള കൊൽക്കത്ത നൈറ്റ് റൈഡേഴ്സിന് ബാക്കിയുള്ള നാല് മത്സരങ്ങളും ജയിച്ചാൽ 17 പോയിന്റോടെ ആദ്യ നാലിൽ ഇടംപിടിക്കാം. എന്നാൽ പട്ടികയിൽ പിന്നിലുള്ള മുംബൈ ഇന്ത്യൻസ്, ലക്നൗ സൂപ്പർ ജയന്റ്സ്, ഡൽഹി ക്യാപിറ്റൽസ് ടീമുകളുടെ അവസ്ഥ അല്പം പ്രയാസകരമാണ്. ശേഷിക്കുന്ന എല്ലാ മത്സരങ്ങളും ജയിച്ചാൽ പോലും ഇവർക്ക് പരമാവധി 14 പോയിന്റ് മാത്രമേ നേടാനാകൂ. അതിനാൽ തന്നെ, സ്വന്തം വിജയത്തോടൊപ്പം മറ്റ് മുൻനിര ടീമുകളുടെ പരാജയം കൂടി ആശ്രയിച്ചായിരിക്കും ഇവരുടെ പ്ലേഓഫ് സാധ്യതകൾ.
