റിയാദ്: സൗദി അറേബ്യയിലേക്കുള്ള വിമാന സർവീസുകൾ പുനരാരംഭിക്കുന്നത് ഇൻഡിഗോ എയർലൈൻസ് വീണ്ടും നീട്ടി. പുതിയ തീരുമാനപ്രകാരം സൗദി തലസ്ഥാനമായ റിയാദിലേക്കുള്ള സർവീസുകൾ ഈ മാസം 31 വരെ നിർത്തിവെച്ചതായി കമ്പനി അറിയിച്ചു. ഇതിനു പുറമെ ജിദ്ദ, ദമാം, മദീന എന്നിവിടങ്ങളിലേക്കുള്ള സർവീസുകൾ ഈ മാസം 27 വരെയും റദ്ദാക്കിയിട്ടുണ്ട്.
ഹൂതി വിമതരുടെ ആക്രമണ ഭീഷണിയും സുരക്ഷാ ആശങ്കകളും തുടരുന്ന സാഹചര്യത്തിലാണ് സർവീസുകൾ പുനരാരംഭിക്കുന്നത് കമ്പനി വൈകിപ്പിക്കുന്നത്. ഈ മാസം 10-ന് റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിന് നേർക്കുണ്ടായ ഹൂതി ആക്രമണത്തെ തുടർന്നാണ് ഇന്ത്യൻ വിമാന കമ്പനികൾ സർവീസുകൾ താത്കാലികമായി നിർത്തിവെച്ചിരുന്നത്.
നേരത്തെ നൽകിയ അറിയിപ്പ് പ്രകാരം ഈ മാസം 24-ന് സർവീസുകൾ പുനരാരംഭിക്കുമെന്നായിരുന്നു ഇൻഡിഗോ വ്യക്തമാക്കിയിരുന്നത്. എന്നാൽ മേഖലയിലെ സുരക്ഷാ സാഹചര്യം കണക്കിലെടുത്ത് ഈ തീയതി വീണ്ടും നീട്ടുകയായിരുന്നു. സർവീസുകൾ പെട്ടെന്ന് റദ്ദാക്കിയത് സൗദിയിലേക്ക് പോകാനിരുന്ന നൂറുകണക്കിന് മലയാളി പ്രവാസികളെയും യാത്രക്കാരെയും കടുത്ത ദുരിതത്തിലാക്കിയിട്ടുണ്ട്.
ഹൂതി ആക്രമണ ഭീഷണി: റിയാദിലേക്കുള്ള ഇൻഡിഗോ സർവീസുകൾ ഈ മാസം 31 വരെ റദ്ദാക്കി
Elvis Chummar
Editorial Head · Jaihind TV (Middle East)
2 min read
105 reads
