ഉപയോക്താക്കൾക്ക് തിരിച്ചടി; ഗൂഗിൾ ഡ്രൈവിലേക്കും ഫോട്ടോസിലേക്കും പരസ്യക്കണ്ണ്, സ്വകാര്യതാ നയത്തിൽ മാറ്റം

സ്വകാര്യത നയത്തിൽ സുപ്രധാന മാറ്റവുമായി ഗൂഗിൾ. ജിമെയിലിലെയും ഗൂഗിൾ ഫോട്ടോസിലെയും ഗൂഗിൾ ഡ്രൈവിലെയും വിവരങ്ങൾ വ്യക്തികേന്ദ്രീകൃത (Personalized) പരസ്യങ്ങൾ കാണിക്കാൻ ഉപയോഗിക്കാൻ വഴി തുറക്കുന്ന രീതിയിലാണ് കമ്പനി തങ്ങളുടെ നയത്തിൽ മാറ്റം വരുത്തിയിരിക്കുന്നത്. ഈ മൂന്ന് സേവനങ്ങളിലെയും സ്വകാര്യ വിവരങ്ങൾ ഉപയോക്താക്കളുടെ താൽപര്യമനുസരിച്ചുള്ള പരസ്യങ്ങൾ എത്തിക്കാൻ ഉപയോഗിക്കില്ല എന്നതായിരുന്നു ഇത്രയും കാലത്തെ ഗൂഗിളിന്റെ പ്രധാന നിലപാട്.

എന്നാൽ, ആ നയത്തിന്റെ വാചകഘടനയിൽ മാറ്റം വരുത്തിയിരിക്കുകയാണ് കമ്പനിയിപ്പോൾ. ഇതോടെ, വിവരം നേരിട്ട് ഉപയോഗിക്കില്ല എന്നതിന് പകരം മറ്റ് ഗൂഗിൾ സർവീസുകൾ ഇവയുമായി ബന്ധിപ്പിച്ചിട്ടുണ്ടെങ്കിൽ അത് ഉപയോഗിച്ച് പരസ്യം കാണിക്കാമെന്ന അവസ്ഥയുണ്ടാകും. പേഴ്സണലൈസ്ഡ് ഇന്റലിജൻസ് അടക്കമുള്ള എഐ സേവനങ്ങളുമായി ജിമെയിലും ഫോട്ടോസും ഡ്രൈവും ലിങ്ക് ചെയ്തിട്ടുള്ള ഉപയോക്താക്കൾക്ക് ഗൂഗിളിന്റെ ഈ പുതിയ നയംമാറ്റം വലിയ തിരിച്ചടിയാകും.