ഗ്ലാസ്‌ഗോ കോമൺവെൽത്ത് ഗെയിംസ്: ചരിത്രമെഴുതി ഷർമിള ധൻകർ; അഞ്ചാം ദിനത്തിൽ ഇന്ത്യയ്ക്ക് ആറു മെഡലുകൾ

ഗ്ലാസ്‌ഗോ: 2026 കോമൺവെൽത്ത് ഗെയിംസിന്റെ അഞ്ചാം ദിനം ഇന്ത്യയ്ക്ക് ചരിത്ര നേട്ടങ്ങളാൽ സമ്പന്നമായി. പാരാ അത്‌ലറ്റിക്‌സിലും ഭാരോദ്വഹനത്തിലും ഹൈജമ്പിലുമായി ഇന്ത്യ ആകെ ആറു മെഡലുകൾ സ്വന്തമാക്കി. ഇതോടെ ഇന്ത്യയുടെ ആകെ മെഡൽ നേട്ടം 10 ആയി ഉയർന്നു.

അഞ്ചാം ദിവസത്തെ ഏറ്റവും വലിയ നേട്ടം വനിതകളുടെ ഷോട്ട്പുട്ട് എഫ്57 വിഭാഗത്തിൽ നിന്നായിരുന്നു. 9.81 മീറ്റർ ദൂരം എറിഞ്ഞ് 40-കാരിയായ ഷർമിള ധൻകർ സ്വർണ മെഡൽ കരസ്ഥമാക്കി. ഇതോടെ കോമൺവെൽത്ത് ഗെയിംസ് പാരാ അത്‌ലറ്റിക്‌സിൽ സ്വർണം നേടുന്ന ആദ്യ ഇന്ത്യൻ താരമെന്ന ചരിത്ര നേട്ടം ഷർമിള സ്വന്തമാക്കി. ഗെയിംസിൽ പാരാ അത്‌ലറ്റിക്‌സ് മെഡൽ നേടുന്ന ആദ്യ ഇന്ത്യൻ വനിതയും ഷർമിളയാണ്.

2006-ന് ശേഷം പാരാ അത്‌ലറ്റിക്‌സിൽ മെഡലിനായുള്ള ഇന്ത്യയുടെ 20 വർഷത്തെ കാത്തിരിപ്പിനും ഇതോടെ വിരാമമായി. 2022-ലെ ബർമിങ്ഹാം കോമൺവെൽത്ത് ഗെയിംസിൽ ഇതേ ഇനത്തിൽ നാലാം സ്ഥാനത്ത് ഫിനിഷ് ചെയ്തതിന്റെ നിരാശയും ഷർമിള ഈ വിജയത്തോടെ മറികടന്നു.

ഷർമിളയുടെ സ്വർണനേട്ടത്തിന് പിന്നാലെ ഇന്ത്യയ്ക്ക് മറ്റൊരു സന്തോഷവാർത്തയും എത്തി. ആദ്യം നാലാം സ്ഥാനത്തായിരുന്ന ശിൽപ കഞ്ചുഗരകോപ്പലു ഷൈല പിന്നീട് വെങ്കല മെഡലിലേക്ക് ഉയർത്തപ്പെട്ടു. നൈജീരിയൻ താരം എച്ചാരിയ ഇയാസിയുടെ പ്രകടനം പുനഃപരിശോധനയ്ക്ക് ശേഷം അസാധുവാക്കിയതോടെയാണ് ശിൽപയ്ക്ക് മെഡൽ ലഭിച്ചത്. കരിയറിലെ മികച്ച പ്രകടനമായി 7.26 മീറ്റർ ദൂരം കണ്ടെത്തിയ ശിൽപ, കോമൺവെൽത്ത് ഗെയിംസ് ചരിത്രത്തിൽ ഒരേ പാരാ അത്‌ലറ്റിക്‌സ് ഇനത്തിൽ ഇന്ത്യയ്ക്ക് രണ്ട് മെഡലുകൾ നേടിക്കൊടുത്ത നേട്ടത്തിനും പങ്കാളിയായി.

ഹരിയാനയിലെ രെവാരി സ്വദേശിയായ ഷർമിളയ്ക്ക് രണ്ട് വയസ്സുള്ളപ്പോൾ പോളിയോ ബാധിച്ച് ഇടതുകാലിന്റെ ചലനശേഷി നഷ്ടമായിരുന്നു. 2020-ൽ ഭർത്താവ് അജിത് സിംഗിന്റെ പ്രോത്സാഹനത്തോടെയാണ് അവർ പാരാ അത്‌ലറ്റിക്‌സിലേക്ക് എത്തിയത്. ആറു വർഷത്തിനുള്ളിൽ കോമൺവെൽത്ത് സ്വർണം സ്വന്തമാക്കി ഷർമിള ശ്രദ്ധേയമായ നേട്ടമാണ് കൈവരിച്ചത്.

പുരുഷന്മാരുടെ ഹൈജമ്പിലും ഇന്ത്യയ്ക്ക് അഭിമാന നേട്ടമുണ്ടായി. 2.25 മീറ്റർ ഉയരം ചാടി സർവേഷ് കുഷാരെ വെള്ളി മെഡൽ നേടി. കോമൺവെൽത്ത് ഗെയിംസ് ഹൈജമ്പിൽ വെള്ളി നേടുന്ന ആദ്യ ഇന്ത്യൻ താരമെന്ന റെക്കോഡും സർവേഷ് സ്വന്തമാക്കി.

ഭാരോദ്വഹനത്തിൽ ഇന്ത്യ മൂന്ന് മെഡലുകൾ കൂടി കൂട്ടിച്ചേർത്തു. വനിതകളുടെ 53 കിലോ വിഭാഗത്തിൽ ജ്ഞാനേശ്വരി യാദവ് വെള്ളി നേടിയപ്പോൾ, പുരുഷന്മാരുടെ 79 കിലോ വിഭാഗത്തിൽ വല്ലൂരി അജയ് ബാബു വെള്ളി മെഡൽ സ്വന്തമാക്കി. സ്‌നാച്ചിൽ 149 കിലോ ഉയർത്തിയ അജയ് ബാബു പുതിയ കോമൺവെൽത്ത് ഗെയിംസ് റെക്കോഡും സ്ഥാപിച്ചു. വനിതകളുടെ 58 കിലോ വിഭാഗത്തിൽ ബിന്ദ്യാറാണി ദേവി വെങ്കല മെഡൽ നേടി.

അഞ്ചാം ദിനം അവസാനിക്കുമ്പോൾ ഇന്ത്യയുടെ ആകെ മെഡൽ നേട്ടം 10 ആയി. ഇതിൽ രണ്ട് സ്വർണം, അഞ്ച് വെള്ളി, മൂന്ന് വെങ്കലം ഉൾപ്പെടുന്നു. മീരാബായ് ചാനുവും ഷർമിള ധൻകറുമാണ് ഇന്ത്യയ്ക്കായി ഇതുവരെ സ്വർണ മെഡലുകൾ നേടിയത്.