ഫ്രാന്‍സില്‍ കനത്ത ജനകീയ പ്രതിഷേധത്തിന് സാധ്യതയുള്ളതിനാല്‍ നഗരങ്ങളില്‍ അതീവ ജാഗ്രത പ്രഖ്യാപിച്ചു. കഴിഞ്ഞയാഴ്ചയുണ്ടായ അക്രമ സംഭവങ്ങള്‍ ആവര്‍ത്തിക്കാതിരിക്കാന്‍ വലിയ മുന്‍കരുതലുകളാണ് നഗരഭരണകൂടങ്ങള്‍ സ്വീകരിച്ചിരിക്കുന്നത്. വരും ദിവസങ്ങളില്‍ യൂണിയനുകള്‍ക്ക് മാത്രമായിരിക്കും പ്രതിഷേധങ്ങള്‍ നടത്താന്‍ അനുമതിയെന്ന് ഫ്രഞ്ച് പ്രസിഡന്റ് ഇമ്മാനുവേല്‍ മാക്രോണ്‍ വ്യക്തമാക്കിയിട്ടുണ്ട്.
സുരക്ഷയുടെ ഭാഗമായി പാരീസിന്റെ വിവിധ ഭാഗങ്ങളില്‍ ഭാഗിക കര്‍ഫ്യൂ ഏര്‍പ്പെടുത്തിയിട്ടുണ്ട്. മാഴ്‌സെ, ലിയോണ്‍ നഗരങ്ങളില്‍ പ്രതിഷേധങ്ങള്‍ക്ക് വിലക്കേര്‍പ്പെടുത്തിയിരിക്കുകയാണ്. ലൂവ്ര് ഉള്‍പ്പെടെയുള്ള പ്രധാന മ്യൂസിയങ്ങളും വിനോദസഞ്ചാര കേന്ദ്രങ്ങളും രണ്ടു ദിവസത്തേക്ക് അടച്ചിടാനും തീരുമാനിച്ചിട്ടുണ്ട്. രാജ്യത്തെ വിവിധ നഗരങ്ങളിലായി 70,000 സുരക്ഷാ ഉദ്യോഗസ്ഥരെ വിന്യസിച്ചിട്ടുണ്ട്. പ്രതിഷേധങ്ങള്‍ ആരംഭിക്കുന്നതിന് മുന്‍പ് പ്രസിഡന്റ് മാക്രോണ്‍ വിദ്യാര്‍ഥി യൂണിയന്‍ നേതാക്കളുമായി ചര്‍ച്ച നടത്തും.
സ്‌കൂള്‍ വിദ്യാഭ്യാസ സമ്പ്രദായത്തിലെ പോരായ്മകള്‍ക്കും അധ്യാപകക്ഷാമത്തിനുമെതിരെ വിദ്യാര്‍ഥികള്‍ തുടങ്ങിയ സമരമാണ് പിന്നീട് രാജ്യവ്യാപക ജനകീയ പ്രക്ഷോഭമായി മാറിയത്. കഴിഞ്ഞ വാരാന്ത്യത്തില്‍ തെരുവിലിറങ്ങിയ ജനം പ്രധാന നഗരങ്ങളില്‍ തീവെപ്പും കൊള്ളയും നടത്തിയിരുന്നു. ഫ്രാന്‍സിന് പുറമെ യൂറോപ്പിലെ മറ്റു രാജ്യങ്ങളിലും ഈ പ്രക്ഷോഭത്തിന്റെ അലയൊലികള്‍ വ്യാപിച്ചിട്ടുണ്ട്.
ഫ്രാന്‍സില്‍ കനത്ത പ്രതിഷേധ സാധ്യത; നഗരങ്ങളില്‍ അതീവ ജാഗ്രതയും കര്‍ശന നിയന്ത്രണങ്ങളും
Jaihind TV News Report
Jaihind TV Web Desk
2 min read
241 reads
