ബാക്ടീരിയ മൂലമുണ്ടാകുന്ന അണുബാധകൾക്കെതിരെ പോരാടാൻ സഹായിക്കുന്ന മരുന്നുകളാണ് ആന്റിബയോട്ടിക്കുകൾ. എന്നാൽ ഇവയുടെ അനാവശ്യവും അമിതവുമായ ഉപയോഗം ഗുരുതരമായ ആരോഗ്യപ്രശ്നങ്ങൾക്കും പാർശ്വഫലങ്ങൾക്കും കാരണമാകും. ഡോക്ടറുടെ കുറിപ്പടിയില്ലാതെ ആന്റിബയോട്ടിക്കുകൾ വാങ്ങിക്കഴിക്കുന്ന പ്രവണത ഇന്ത്യയിൽ വർദ്ധിച്ചുവരുന്നത് ഏറെ ആശങ്കാജനകമാണെന്ന് ഐ.സി.എം.ആർ (ICMR) അഡീഷണൽ ഡയറക്ടർ ജനറൽ ഡോ. സംഘമിത്ര പതി വ്യക്തമാക്കി. സ്കൂൾ തലം മുതൽ തന്നെ ഇതിനെതിരെ ശക്തമായ ബോധവൽക്കരണം അനിവാര്യമാണെന്നും അവർ ചൂണ്ടിക്കാട്ടി.
വൈറൽ പനിയോ ഫ്ലൂവോ ഉണ്ടാകുമ്പോൾ സ്വയം മരുന്ന് വാങ്ങി കഴിക്കുന്ന ശീലം പലർക്കുമുണ്ട്. എന്നാൽ ഇത്തരം വൈറൽ അണുബാധകൾക്കെതിരെ ആന്റിബയോട്ടിക്കുകൾ ഫലപ്രദമല്ലെന്ന് ദില്ലി കൈലാഷ് ദീപക് ആശുപത്രിയിലെ ഡോ. മാൻസി നിഗം പറയുന്നു. കൃത്യമായ രോഗനിർണയം നടത്താതെ തെറ്റായ മരുന്നുകൾ കഴിക്കുന്നത് യഥാർത്ഥ ചികിത്സ വൈകിപ്പിക്കുകയും, ശരീരത്തിൽ അലർജി ഉൾപ്പെടെയുള്ള അപ്രതീക്ഷിത പാർശ്വഫലങ്ങൾ ഉണ്ടാക്കുകയും ചെയ്യും.
ഡോക്ടർ നിർദ്ദേശിക്കുന്ന കാലാവധി പൂർത്തിയാക്കാതെ രോഗലക്ഷണങ്ങൾ കുറയുമ്പോൾ തന്നെ മരുന്ന് നിർത്തുന്നത് ബാക്ടീരിയകൾക്ക് ആന്റിബയോട്ടിക് പ്രതിരോധശേഷി (Antibiotic Resistance) ഉണ്ടാകാൻ കാരണമാകും. ആന്റിബയോട്ടിക്കുകൾ ശരീരത്തിലെ ചീത്ത ബാക്ടീരിയകൾക്കൊപ്പം കുടലിലെ ഗുണകരമായ ബാക്ടീരിയകളെക്കൂടി നശിപ്പിക്കുന്നു. ഇത് വയറിളക്കം, വയറുവേദന, ദഹനക്കേട് തുടങ്ങിയ പ്രശ്നങ്ങൾക്കും, ഫംഗസ് ബാധ, ചർമ്മത്തിലെ അലർജി എന്നിവയ്ക്കും വഴിവെക്കും.
ശ്രദ്ധിക്കേണ്ട പ്രധാന കാര്യങ്ങൾ:
ഡോക്ടറുടെ നിർദ്ദേശപ്രകാരം മാത്രം ആന്റിബയോട്ടിക്കുകൾ കഴിക്കുക.
രോഗലക്ഷണങ്ങൾ മാറിക്കഴിഞ്ഞാലും ഡോക്ടർ പറഞ്ഞ ദിവസങ്ങളിലേക്ക് മരുന്നിന്റെ കോഴ്സ് പൂർണ്ണമായും പൂർത്തിയാക്കുക.
സാധാ ജലദോഷം, നേരിയ ചുമ എന്നിവയ്ക്ക് അനാവശ്യമായി ആന്റിബയോട്ടിക്കുകൾ കഴിക്കരുത്.
മുൻപ് കഴിച്ചതിൽ ബാക്കി വന്ന ആന്റിബയോട്ടിക്കുകൾ പിന്നീട് സ്വയം ഉപയോഗിക്കരുത്.
