ഇടുക്കി: നിയമസഭാ തിരഞ്ഞെടുപ്പിലേറ്റ തിരിച്ചടിയും പാർട്ടി നേതാക്കൾക്കെതിരെയുള്ള സാമ്പത്തിക ആരോപണങ്ങളും ചർച്ച ചെയ്യാൻ സി.പി.എം ഇടുക്കി വിപുലീകൃത ജില്ലാ കമ്മിറ്റി യോഗം ഇന്നും നാളെയും അടിമാലിയിൽ നടക്കും. തിരഞ്ഞെടുപ്പ് തോൽവിയിൽ വിശദമായ ചർച്ചയും സ്വയംവിമർശനവും രണ്ട് ദിവസം നീളുന്ന യോഗത്തിലുണ്ടാകും.
പാർട്ടിയുടെ പരമ്പരാഗത കോട്ടയായിരുന്ന ഉടുമ്പഞ്ചോല മണ്ഡലത്തിലേറ്റ അപ്രതീക്ഷിത പരാജയവും ദേവികുളം മണ്ഡലത്തിൽ എ. രാജ തോറ്റതും കമ്മിറ്റിയിൽ ചൂടേറിയ ചർച്ചകൾക്ക് വഴിതെളിക്കും. തോൽവിക്ക് പിന്നിലെ സംഘടനാപരമായ വീഴ്ചകൾ പരിശോധിക്കും.
കഴിഞ്ഞ പത്ത് വർഷത്തിനിടെ പാർട്ടി നേതാക്കൾ നയിച്ച ആഡംബര ജീവിതവും അനധികൃത സ്വത്ത് സമ്പാദനവും യോഗത്തിൽ പ്രധാന ചർച്ചാവിഷയമാകും. നേതാക്കളുടെ ജീവിതരീതി ജനങ്ങൾക്കിടയിൽ പാർട്ടിക്ക് വലിയ അപമതിപ്പുണ്ടാക്കിയെന്ന വിലയിരുത്തലിലാണ് ഈ വിഷയം ഗൗരവമായി പരിഗണിക്കുന്നത്.
ജില്ലയിലെ 15 ഏരിയാ കമ്മിറ്റികളിൽ നിന്നും വിവിധ ബഹുജന വർഗ്ഗ ബഹുജന സംഘടനകളിൽ നിന്നുമായി 130 പ്രതിനിധികളാണ് അടിമാലിയിൽ നടക്കുന്ന യോഗത്തിൽ പങ്കെടുക്കുന്നത്
