കേരളത്തിന്റെ നിയുക്ത മുഖ്യമന്ത്രി വി.ഡി. സതീശന് നേരിട്ടെത്തി അഭിനന്ദനങ്ങൾ അറിയിച്ച് ആശാ സമരസമിതി ഭാരവാഹികൾ. തിരുവനന്തപുരം കന്റോൺമെന്റ് ഹൗസിലെത്തിയാണ് സമരസമിതി നേതാക്കൾ നിയുക്ത മുഖ്യമന്ത്രിയെ കണ്ടത്. തങ്ങളുടെ നീതിക്കായുള്ള പോരാട്ടത്തിൽ പ്രതിപക്ഷ നേതാവെന്ന നിലയിലും അല്ലാതെയും തങ്ങൾക്കൊപ്പം ഉറച്ചുനിന്ന വി.ഡി. സതീശൻ ഭരണത്തലപ്പത്തേക്ക് എത്തുന്നതിലുള്ള സന്തോഷവും കൃതജ്ഞതയും പ്രകടിപ്പിക്കാനാണ് അവർ എത്തിയത്.
തങ്ങളുടെ ന്യായമായ അവകാശങ്ങൾ നേടിയെടുക്കുന്നതിനായി ആശാ വർക്കർമാർ കടുത്ത വെല്ലുവിളികളെ അതിജീവിച്ച് 256 ദിവസമാണ് തലസ്ഥാനത്ത് സമരം നടത്തിയത്. ഈ നീണ്ട സമരകാലയളവിലുടനീളം വി.ഡി. സതീശനും കോൺഗ്രസും യുഡിഎഫ് മുന്നണിയും സമരക്കാർക്ക് ശക്തമായ രാഷ്ട്രീയവും ധാർമ്മികവുമായ പിന്തുണ നൽകിയിരുന്നു. സാധാരണക്കാരായ സ്ത്രീ തൊഴിലാളികളുടെ ഈ പോരാട്ടത്തെ നിയമസഭയ്ക്കകത്തും പുറത്തും കൃത്യമായി ഉന്നയിക്കാൻ വി.ഡി. സതീശന്റെ നേതൃത്വത്തിന് സാധിച്ചിരുന്നു.
യുഡിഎഫ് സർക്കാർ അധികാരത്തിൽ വന്നാൽ ആശാ വർക്കർമാരുടെ ന്യായമായ ആവശ്യങ്ങൾക്ക് പ്രഥമ പരിഗണന നൽകി പരിഹാരം കാണുമെന്ന് തിരഞ്ഞെടുപ്പ് വേളയിലും അതിന് മുൻപും കോൺഗ്രസ് നേതൃത്വം ഉറപ്പുനൽകിയിരുന്നു. ഈ വാഗ്ദാനം പുതിയ സർക്കാർ പാലിക്കുമെന്ന വലിയ പ്രതീക്ഷയിലാണ് ജീവനക്കാർ. ആശാ സമരസമിതി പ്രമുഖ ഭാരവാഹിയായ എസ്. മിനിയുടെ നേതൃത്വത്തിലുള്ള പ്രതിനിധി സംഘമാണ് കന്റോൺമെന്റ് ഹൗസിലെത്തി നിയുക്ത മുഖ്യമന്ത്രിക്ക് വരും നാളുകളിലെ ഭരണത്തിന് എല്ലാവിധ ആശംസകളും അഭിനന്ദനങ്ങളും നേർന്നത്.
