ലികോം റെഗുലേറ്ററി അതോറിറ്റി ഓഫ് ഇന്ത്യയുടെ (ട്രായ്) പുതിയ നിർദേശങ്ങൾ പാലിച്ചുകൊണ്ട് മൊബൈൽ ഡാറ്റ ഒഴിവാക്കിയുള്ള മൂന്ന് പുതിയ പ്രീപെയ്ഡ് പ്ലാനുകൾ ഭാരതി എയർടെൽ പുറത്തിറക്കി. കോളുകൾക്കും എസ്എംഎസുകൾക്കും മാത്രമായി പ്രത്യേകമായി തയാറാക്കിയ പ്ലാനുകളാണ് കമ്പനി അവതരിപ്പിച്ചിരിക്കുന്നത്. ട്രായ് നിശ്ചയിച്ച ഒക്ടോബർ 21 എന്ന സമയപരിധിക്ക് തൊട്ടുമുമ്പാണ് എയർടെൽ ഈ പുതിയ ചട്ടങ്ങൾ നടപ്പിലാക്കിയിരിക്കുന്നത്. മൂന്ന് പ്ലാനുകളിലും അൺലിമിറ്റഡ് ലോക്കൽ, എസ്ടിഡി, റോമിങ് കോളുകൾ ലഭ്യമാണ്. ഇതിനൊപ്പം വാലിഡിറ്റി കാലാവധിയിൽ ആകെ 300 എസ്എംഎസുകളും സൌജന്യ ഹലോട്യൂൺസ് സേവനവും ഉപയോക്താക്കൾക്ക് ലഭിക്കും.
ഏറ്റവും കുറഞ്ഞ നിരക്കിലുള്ള 185 രൂപയുടെ പ്ലാനിന് 28 ദിവസത്തെ കാലാവധിയാണ് നൽകിയിരിക്കുന്നത്. അൺലിമിറ്റഡ് കോളിങ്, 300 എസ്എംഎസ് ആനുകൂല്യങ്ങളോടെ വരുന്ന 203 രൂപ പ്ലാനിന് 30 ദിവസത്തെ വാലിഡിറ്റി ലഭിക്കും. മൂന്നാമത്തെ പ്ലാനായ 206 രൂപയുടേതിൽ നിശ്ചിത ദിവസങ്ങൾക്ക് പകരം കൃത്യം ഒരു കലണ്ടർ മാസത്തെ വാലിഡിറ്റിയാണ് ലഭ്യമാകുന്നത്.
കോളുകൾക്ക് മാത്രമായി ഫോൺ ഉപയോഗിക്കുന്ന സാധാരണക്കാരും ഫീച്ചർ ഫോൺ ഉപയോക്താക്കളും ഉപയോഗിക്കാത്ത ഡാറ്റയ്ക്ക് അധിക തുക നൽകേണ്ടി വരുന്നുവെന്ന പരാതികൾ പരിഗണിച്ചാണ് ട്രായ് ഇത്തരമൊരു തീരുമാനം കൈക്കൊണ്ടത്. ഇതിനായി ഡാറ്റ ബണ്ടിൽ ചെയ്യാത്ത വൗച്ചറുകൾ അവതരിപ്പിക്കാൻ ട്രായ് ടെലികോം കമ്പനികൾക്ക് സമയം അനുവദിച്ചിരുന്നു. പ്രധാനമായും ബണ്ടിൽ ചെയ്ത ഡാറ്റ ആവശ്യമില്ലാത്തവർക്കും, ഇന്റർനെറ്റിനായി വൈഫൈ മാത്രം ഉപയോഗിക്കുന്നവർക്കും, സെക്കൻഡറി സിം കാർഡുകൾ കോളിങ്ങിനായി മാത്രം സജീവമായി നിലനിർത്താൻ ആഗ്രഹിക്കുന്നവർക്കും ഈ പ്ലാനുകൾ ഏറെ ഉപകാരപ്രദമാകും. എയർടെൽ വെബ്‌സൈറ്റിലും ആപ്പിലും ഈ പ്ലാനുകൾ ലഭ്യമാണ്.
ഡാറ്റ വേണ്ട, കോളിങ് മാത്രം മതിയോ? പുതിയ 3 വോയ്‌സ് പ്ലാനുകളുമായി ഭാരതി എയർടെൽ
Jaihind TV News Report
Jaihind TV Web Desk
2 min read
34 reads
