ചെന്നൈ: പ്രശസ്ത ചലച്ചിത്ര സംവിധായകൻ സിംഗീതം ശ്രീനിവാസ റാവു (94) അന്തരിച്ചു. വാർധക്യസഹജമായ അസുഖങ്ങളെ തുടർന്ന് ചെന്നൈയിലെ കാവേരി ആശുപത്രിയിൽ ചികിത്സയിലായിരിക്കെയാണ് അന്ത്യം. തന്റെ 94-ാം വയസ്സിലും സിനിമ സംവിധാനം ചെയ്ത് ചലച്ചിത്ര ലോകത്തെ അത്ഭുതപ്പെടുത്തിയ പ്രതിഭയായിരുന്നു അദ്ദേഹം. നാഗ് അശ്വിൻ നിർമ്മിച്ച് പുറത്തിറങ്ങിയ ‘സിംഗീതം’ ആണ് അദ്ദേഹം അവസാനമായി സംവിധാനം ചെയ്ത ചിത്രം. പ്രായത്തെ തോൽപ്പിക്കുന്ന സിനിമയോടുള്ള താല്പര്യം അദ്ദേഹത്തിന് ഇൻഡസ്ട്രിയിൽ വലിയ പ്രശംസ നേടിക്കൊടുത്തിരുന്നു.
വ്യത്യസ്തവും പരീക്ഷണാത്മകവുമായ കഥപറച്ചിൽ ശൈലിയിലൂടെ ഇന്ത്യൻ സിനിമയിൽ തന്റേതായ ചരിത്രം കുറിച്ച വ്യക്തിത്വമാണ് സിംഗീതം ശ്രീനിവാസ റാവു. തെലുങ്ക്, തമിഴ്, കന്നഡ, മലയാളം ഉൾപ്പെടെ വിവിധ ഭാഷകളിലായി നിരവധി മാസ്റ്റർപീസ് ചിത്രങ്ങൾ അദ്ദേഹം സമ്മാനിച്ചു. സംഭാഷണങ്ങളില്ലാത്ത ബ്ലാക്ക് കോമഡി ചിത്രമായ 'പുഷ്പക വിമാനം', ഇന്ത്യൻ സിനിമയിലെ ആദ്യകാല ടൈം ട്രാവൽ ചിത്രങ്ങളിലൊന്നായ 'ആദിത്യ 369', ഫാന്റസി ചിത്രമായ 'ഭൈരവ ദ്വീപം', തമിഴിലെ എവർഗ്രീൻ ഹിറ്റുകളായ 'അപൂർവ്വ സഹോദരങ്ങൾ', 'മൈക്കിൾ മദന കാമരാജൻ' തുടങ്ങിയവ അദ്ദേഹത്തിന്റെ സംവിധാന മികവിന് ഉദാഹരണങ്ങളാണ്. അദ്ദേഹത്തിന്റെ വേർപാടിൽ ചലച്ചിത്ര രംഗത്തെ പ്രമുഖരും ആരാധകരും അനുശോചനം രേഖപ്പെടുത്തി.
