മലയാളത്തിലെ ആദ്യ AI സിനിമ ‘വാഗ്ദത്തഭൂമി’; പോസ്റ്റർ പ്രകാശനം നിർവഹിച്ച് മുഖ്യമന്ത്രി വി.ഡി. സതീശൻ

തിരുവനന്തപുരം: മലയാള സിനിമയുടെ ചരിത്രത്തിൽ പുതിയ സാങ്കേതിക അധ്യായത്തിന് തുടക്കമിട്ട്, ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യ ഉപയോഗിച്ച് ഒരുക്കുന്ന ആദ്യ മലയാള ചിത്രമെന്ന വിശേഷണവുമായി എത്തുന്ന ‘വാഗ്ദത്തഭൂമി’യുടെ പോസ്റ്റർ പ്രകാശനം നടന്നു. തിരുവനന്തപുരത്ത് നടന്ന ചടങ്ങിൽ കേരള മുഖ്യമന്ത്രി വി.ഡി. സതീശൻ പോസ്റ്റർ പ്രകാശനം നിർവഹിച്ചു. ചിത്രത്തിന്റെ നിർമ്മാതാവ് ഷാജു വാലപ്പൻ ചടങ്ങിൽ പങ്കെടുത്തു.

പ്രശസ്ത സംവിധായകനും കാർട്ടൂണിസ്റ്റുമായ സിദ്ദിക്ക് പറവൂർ സംവിധാനം ചെയ്യുന്ന ചിത്രം, AI സാങ്കേതികവിദ്യയെ സൃഷ്ടിപരമായി പ്രയോജനപ്പെടുത്തി മലയാള സിനിമയിൽ പുതിയ പരീക്ഷണത്തിന് വഴിതെളിക്കുന്നതാണ്. പരമ്പരാഗത ചലച്ചിത്രഭാഷയും നവീന ആർട്ടിഫിഷ്യൽ ഇന്റലിജൻസ് സംവിധാനങ്ങളും സമന്വയിപ്പിച്ചാണ് ചിത്രം ഒരുക്കുന്നത്.

കേരളത്തിന്റെ മലയോര മേഖലകളുടെ പശ്ചാത്തലത്തിൽ ഭൂമിയോടും ജന്മനാടിനോടും പൂർവികരുടെ ഓർമകളോടുമുള്ള മനുഷ്യന്റെ ആത്മബന്ധമാണ് ചിത്രത്തിന്റെ പ്രധാന പ്രമേയം. വിദേശ കുടിയേറ്റത്തിന്റെ പശ്ചാത്തലത്തിൽ സ്വന്തം വേരുകളിൽ നിന്ന് അകന്നുപോകുന്ന പുതിയ തലമുറയുടെ ജീവിതവും പ്രകൃതിയോടുള്ള മനുഷ്യന്റെ ഉത്തരവാദിത്വവും ചിത്രം ചർച്ച ചെയ്യുന്നു.

AI സാങ്കേതികവിദ്യയുടെ സഹായത്തോടെ കഥാപാത്ര രൂപകൽപ്പന, ദൃശ്യാവിഷ്കാരം, സിനിമാറ്റിക് അന്തരീക്ഷം എന്നിവ സൃഷ്ടിക്കുന്ന ചിത്രമെന്ന നിലയിൽ ‘വാഗ്ദത്തഭൂമി’ മലയാള സിനിമയ്ക്ക് പുതിയ സാങ്കേതിക സാധ്യതകൾ തുറന്നുകൊടുക്കുമെന്നാണ് അണിയറപ്രവർത്തകരുടെ പ്രതീക്ഷ.

ലോക സിനിമയിൽ അതിവേഗം വളർന്നുവരുന്ന AI ഫിലിം മേക്കിംഗ് മേഖലയിലേക്ക് മലയാള സിനിമയുടെ സാന്നിധ്യം രേഖപ്പെടുത്തുന്ന ശ്രദ്ധേയ ശ്രമം കൂടിയാണ് ഈ ചിത്രം.

വാലപ്പൻ ക്രിയേഷൻസിന്റെ ബാനറിൽ ഷാജു വാലപ്പൻ നിർമ്മിക്കുന്ന ചിത്രത്തിന്റെ സംവിധാനം സിദ്ദിക്ക് പറവൂർ നിർവഹിക്കുന്നു. ചിത്രത്തിന്റെ പബ്ലിക് റിലേഷൻസ് ചുമതല എം. കെ. ഷെജിനാണ്.