കണ്ണൂരിലെ യൂത്ത് കോൺഗ്രസ് പ്രവർത്തകൻ ഷുഹൈബ് വധക്കേസിലെ പ്രതികൾക്ക് കനത്ത തിരിച്ചടി. കേസിന്റെ വിചാരണ മറ്റൊരു കോടതിയിലേക്ക് മാറ്റണമെന്ന പ്രതിഭാഗത്തിന്റെ ഹർജി തലശേരി സെഷൻസ് കോടതി തള്ളി. നിലവിൽ കണ്ണൂർ അഡീഷണൽ സെഷൻസ് കോടതി മുൻപാകെ നടക്കുന്ന വിചാരണ നടപടികൾ മാറ്റണമെന്നായിരുന്നു പ്രതികളുടെ പ്രധാന ആവശ്യം. ഹർജി തള്ളിയതോടെ കേസിന്റെ വിചാരണാ നടപടികൾ ഉടൻ പുനരാരംഭിക്കും.
കേസിലെ വിചാരണ നടപടികൾ നീട്ടിക്കൊണ്ടുപോകാൻ പ്രതിഭാഗം മനഃപൂർവം ശ്രമിക്കുകയാണെന്ന ആക്ഷേപങ്ങൾ ശക്തമാകുന്നതിനിടയിലാണ് കോടതി മാറ്റ ഹർജി സമർപ്പിക്കപ്പെട്ടത്. ഈ ഹർജി പരിഗണനയിലിരുന്നതിനെ തുടർന്ന് അഡീഷണൽ സെഷൻസ് കോടതിയിലെ വിചാരണ നടപടികൾ സെഷൻസ് കോടതി താത്കാലികമായി സ്റ്റേ ചെയ്തിരുന്നു. ഹർജി നിലനിൽക്കുന്നതിനാൽ സാക്ഷി വിസ്താരവുമായി സഹകരിക്കാൻ പ്രതിഭാഗം അഭിഭാഷകരും തയ്യാറായിരുന്നില്ല. എന്നാൽ ഹർജി പൂർണ്ണമായും തള്ളിയതോടെ വിചാരണാ നടപടികൾക്ക് ഇനി വേഗതയേറും.
