തിരുവനന്തപുരം: പുതുവത്സരാഘോഷങ്ങളുടെ ഭാഗമായി തിരക്ക് നിയന്ത്രിക്കാന്‍ തലസ്ഥാനത്ത് വിപുലമായ സുരക്ഷാ ക്രമീകരണങ്ങള്‍ ഒരുക്കുമെന്ന് സിറ്റി പോലീസ് കമ്മീഷണര്‍. മാനവീയത്ത് ബാരിക്കേഡുകള്‍ സ്ഥാപിക്കുമെന്നും ഡിജെ പാര്‍ട്ടി നടക്കുന്ന ഇടങ്ങളില്‍ ആളുകളുടെ പേര് വിവരങ്ങള്‍ സൂക്ഷിക്കുമെന്നും അറിയിച്ചു. സിസിടിവി ക്യാമറകളും ഉറപ്പാക്കും.
പൊതുജനങ്ങള്‍ക്ക് ബുദ്ധിമുട്ട് ഉണ്ടായാല്‍ നടപടി സ്വീകരിക്കുമെന്ന് അറിയിച്ചു. ലഹരി ഉപയോഗം കണ്ടെത്താന്‍ പ്രത്യേക സംവിധാനം ഏര്‍പ്പെടുത്തും. വാഹനങ്ങള്‍ പാര്‍ക്ക് ചെയ്യുന്നതിന് പ്രത്യേക ക്രമീകരണം ഏര്‍പ്പെടുത്തിയിട്ടുണ്ട്. അതേസമയം പാര്‍ക്ക് ചെയ്യുന്ന വാഹനങ്ങളില്‍ കോണ്‍ടാക്ട് നമ്പര്‍ പതിക്കണമെന്ന് മുന്നറിയിപ്പുണ്ട്. മാനവിയം വീഥിയില്‍ അടക്കം 12 മണിയോടെ പരിപാടികള്‍ അവസാനിപ്പിക്കാനാണ് തീരുമാനമെന്നും അറിയിച്ചു.
