കേരളത്തിൽ അടുത്ത അഞ്ചുദിവസം മഴയ്ക്ക് സാദ്ധ്യതയുണ്ടെന്ന് കേന്ദ്ര കാലാവസ്ഥാവകുപ്പ്. വിവിധ ജില്ലകളിൽ കേന്ദ്ര കാലാവസ്ഥാ വകുപ്പ് മഞ്ഞ അലർട്ട് പ്രഖ്യാപിച്ചു. 30-ാം തീയതി കണ്ണൂർ, കാസർകോട് ജില്ലകളിൽ മഞ്ഞ അലർട്ട് പ്രഖ്യാപിച്ചു. മേയ് ഒന്നിന് പത്തനംതിട്ട, ഇടുക്കി, വയനാട് ജില്ലകളിലും രണ്ടാം തീയതി ആലപ്പുഴ, കോട്ടയം, എറണാകുളം ജില്ലകളിലും മഞ്ഞ അലർട്ട് പ്രഖ്യാപിച്ചു.ഒറ്റപ്പെട്ട ശക്തമായ മഴയ്ക്കുള്ള സാദ്ധ്യതയാണ് പ്രവചിക്കപ്പെട്ടിരിക്കുന്നത്. 29-ാം തീയതി മുതൽ മേയ് ഒന്ന് വരെ ഇടിമിന്നലോടു കൂടിയ മഴയ്ക്കും മണിക്കൂറിൽ 40-50 കിലോമീറ്റർ വരെ വേഗതയിൽ ശക്തമായ കാറ്റിനും സാദ്ധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
അതേസമയം ചുട്ടുപൊള്ളുന്ന വേനല്‍ച്ചൂടില്‍ വിങ്ങിപ്പൊട്ടിനിന്ന അനന്തപുരിക്ക് കുളിര്‍മയേകി ഒടുവില്‍ അപ്രതീക്ഷിതമായി ആ വേനല്‍മഴയെത്തി. ദിവസങ്ങളായി തുടരുന്ന അസഹ്യമായ ചൂടിന് നേരിയൊരു ഇടവേള നല്‍കിക്കൊണ്ടാണ് ഈ മഴപെയ്ത്ത്. ചുട്ടുപഴുത്ത നഗരവീഥികളെ മാത്രമല്ല, വേനലില്‍ ആവിയായിരുന്ന മനുഷ്യ മനസ്സുകളെയും ഒരേപോലെ തണുപ്പിക്കാന്‍ ഈ അപ്രതീക്ഷിത മഴയ്ക്കായി.
