തിരുവനന്തപുരം: പി.എസ്.സി പരീക്ഷാ ക്രമക്കേട് കേസില്‍ ചോദ്യം ചെയ്യലിനായി ക്രൈംബ്രാഞ്ച് ഓഫീസില്‍ ഹാജരാകണമെന്ന തീരുമാനത്തില്‍ വിട്ടുവീഴ്ചയില്ലെന്ന് എസ്.ഐ.ടി (SIT) വ്യക്തമാക്കി. അന്വേഷണ ഉദ്യോഗസ്ഥയായ ഐ.ജി അജിത ബീഗമാണ് പി.എസ്.സി സെക്രട്ടറി അയച്ച കത്തിന് മറുപടി നല്‍കിയത്. ചോദ്യം ചെയ്യലിനായി ക്രൈംബ്രാഞ്ച് ഓഫീസില്‍ തന്നെ ഉദ്യോഗസ്ഥര്‍ നിര്‍ബന്ധമായും ഹാജരാകണമെന്നും, പി.എസ്.സിയുടെ പ്രോട്ടോകോള്‍ ഇതിന് ബാധകമല്ലെന്നും അന്വേഷണ സംഘം മറുപടിയില്‍ കടുപ്പിച്ചു.
പി.എസ്.സി ഭരണഘടനാ സ്ഥാപനമായതിനാല്‍ പ്രോട്ടോകോള്‍ പ്രകാരം ചെയര്‍മാനോ അംഗങ്ങള്‍ക്കോ ചോദ്യം ചെയ്യലിനായി ക്രൈംബ്രാഞ്ച് ഓഫീസില്‍ എത്താനാവില്ലെന്നായിരുന്നു സെക്രട്ടറി എസ്.ഐ.ടിയെ അറിയിച്ചിരുന്നത്. അന്വേഷണ ഉദ്യോഗസ്ഥര്‍ക്ക് വേണമെങ്കില്‍ പി.എസ്.സി ആസ്ഥാനത്ത് എത്തി മൊഴിയെടുക്കാമെന്നും കത്തില്‍ പറഞ്ഞിരുന്നു. ഈ നിലപാടിലാണ് എസ്.ഐ.ടി ഇപ്പോള്‍ വിട്ടുവീഴ്ചയില്ലെന്ന് വ്യക്തമാക്കിയത്. വരും ദിവസങ്ങളില്‍ സ്വീകരിക്കേണ്ട നിലപാടിനെക്കുറിച്ച് തിങ്കളാഴ്ച ചേരുന്ന പി.എസ്.സി യോഗം നിയമോപദേശത്തിന് ശേഷം അന്തിമ തീരുമാനമെടുക്കും.
നിലവില്‍ പി.എസ്.സിയിലെ നാല് അംഗങ്ങള്‍ക്കാണ് ചോദ്യം ചെയ്യലിനായി എസ്.ഐ.ടി നോട്ടീസ് നല്‍കിയിരിക്കുന്നത്. ഇവിടുത്തെ ചോദ്യം ചെയ്യല്‍ പൂര്‍ത്തിയായ ശേഷമാകും ചെയര്‍മാന്‍ കെ.ആര്‍. ബൈജുവിനെ വിളിച്ചുവരുത്തുക. തട്ടിപ്പില്‍ ക്രിമിനല്‍ ഗൂഢാലോചന നടന്നിട്ടുണ്ടോയെന്നാണ് എസ്.ഐ.ടി അന്വേഷിക്കുന്നത്. സി.പി.എം അനുകൂലിയായ ഉദ്യോഗാര്‍ത്ഥിക്ക് ക്രമവിരുദ്ധമായി നിയമനം ലഭിച്ചതുമായി ബന്ധപ്പെട്ട തട്ടിപ്പില്‍, മൂല്യനിര്‍ണയത്തില്‍ ഗുരുതര പിഴവുണ്ടായെന്ന് അറിഞ്ഞിട്ടും ചെയര്‍മാന്‍ നടപടി സ്വീകരിക്കുകയോ പോലീസിനെ അറിയിക്കുകയോ ചെയ്തില്ലെന്നും പ്രതികളായ ഉദ്യോഗസ്ഥരെ സംരക്ഷിക്കുന്ന നിലപാടാണ് സ്വീകരിച്ചതെന്നും എസ്.ഐ.ടി റിപ്പോര്‍ട്ടില്‍ സൂചിപ്പിക്കുന്നു.
പി എസ് സി ക്രമക്കേട്: ചോദ്യം ചെയ്യലിന് ക്രൈംബ്രാഞ്ച് ഓഫീസില്‍ തന്നെ ഹാജരാകണം: എസ്‌ഐടി
Jaihind TV News Report
Jaihind TV Web Desk
Updated Oct 12, 2026
2 min read
380 reads
