യുഡിഎഫ് സർക്കാരിന്റെ പ്രഖ്യാപനങ്ങളിൽ ഏറ്റവും ശ്രദ്ധേയമായ സ്ത്രീ ശാക്തീകരണ പദ്ധതിയെന്ന നിലയിൽ, കെഎസ്ആർടിസി ബസുകളിൽ സ്ത്രീകൾക്ക് സൗജന്യ യാത്ര ഉറപ്പാക്കുന്ന 'പ്രിയദർശിനി' പദ്ധതി വിജയകരമായി 100 ദിവസം പൂർത്തിയാക്കുന്നു. സർക്കാരിന്റെ വാഗ്ദാനങ്ങൾ വെറും പ്രഖ്യാപനങ്ങളല്ലെന്നും സാധാരണക്കാരുടെ ജീവിതത്തിൽ നേരിട്ട് മാറ്റം കൊണ്ടുവരുന്ന ജനക്ഷേമ ഇടപെടലുകളാണെന്നും തെളിയിക്കുന്നതാണ് ഈ പദ്ധതിക്ക് ലഭിച്ച വൻ സ്വീകാര്യത. നിലവിൽ പ്രതിദിനം 14 ലക്ഷത്തോളം വനിതകളാണ് ഈ സൗജന്യ യാത്രാ സൗകര്യം പ്രയോജനപ്പെടുത്തുന്നത്.
ജോലിക്കാർ, വിദ്യാർത്ഥികൾ, ചികിത്സയ്ക്കായി യാത്ര ചെയ്യുന്നവർ തുടങ്ങി വിവിധ മേഖലകളിലുള്ള സാധാരണക്കാരായ സ്ത്രീകൾക്ക് പ്രതിമാസ യാത്രാച്ചെലവിലുണ്ടാകുന്ന വലിയൊരു തുക ലാഭിക്കാൻ ഈ പദ്ധതിയിലൂടെ സാധിക്കുന്നുണ്ട്. നിത്യനിദാന ചെലവുകൾക്കൊപ്പം യാത്രാക്കൂലിയും കണ്ടെത്താൻ പ്രയാസപ്പെട്ടിരുന്ന കുടുംബങ്ങൾക്ക് പ്രിയദർശിനി പദ്ധതി വലിയൊരു സാമ്പത്തിക ആശ്വാസമാണ് നൽകുന്നത്.
സാമ്പത്തിക ആശ്വാസത്തിന് ഉപരിയായി, സ്ത്രീകൾക്ക് കൂടുതൽ സ്വാതന്ത്ര്യത്തോടെയും ആത്മവിശ്വാസത്തോടെയും യാത്ര ചെയ്യാനുള്ള അവസരവും ഈ പദ്ധതി ഒരുക്കുന്നു. നൂറു ദിനങ്ങൾ പിന്നിടുമ്പോൾ കേവലം ഒരു സൗജന്യ യാത്രാ പദ്ധതി എന്നതിനപ്പുറം, കേരളത്തിലെ സ്ത്രീകളുടെ ദൈനംദിന ജീവിതത്തെയും സാമൂഹിക മുന്നേറ്റത്തെയും സ്വാധീനിക്കുന്ന കരുത്തുറ്റ ജനക്ഷേമ പദ്ധതിയായി പ്രിയദർശിനി മാറിയിരിക്കുകയാണ്.
