സ്വാതന്ത്ര്യദിനാഘോഷങ്ങളുടെ ഭാഗമായി കാസർകോട്, കുമ്പള, മഞ്ചേശ്വരം ഉപജില്ലകളിലെ എൽ.പി വിഭാഗം വിദ്യാർത്ഥികൾക്കായി സോഷ്യൽ സയൻസ് ക്ലബ് അസോസിയേഷൻ സംഘടിപ്പിച്ച 'ഫ്രീഡം ക്വിസ് 2026' മത്സരത്തിലെ ചോദ്യം വലിയ വിവാദത്തിന് വഴിതെളിച്ചു. ക്വിസിലെ 15 പ്രധാന ചോദ്യങ്ങൾക്ക് പുറമെ നൽകിയ 5 ടൈ ബ്രേക്കർ ചോദ്യങ്ങളിലെ അവസാനത്തെ ചോദ്യമാണ് പ്രതിഷേധത്തിന് കാരണമായത്. 'ബ്രിട്ടീഷുകാരുടെ കയ്യിൽനിന്ന് ഏറ്റവും കൂടുതൽ ശിക്ഷ ലഭിച്ച സ്വാതന്ത്ര്യസമര സേനാനി ആര്?' എന്നായിരുന്നു ചോദ്യം.
അധ്യാപകർക്ക് നൽകിയ ഉത്തരസൂചികയിൽ (Answer Key) ഇതിന്റെ ഉത്തരമായി വി.ഡി. സവർക്കറുടെ പേരാണ് രേഖപ്പെടുത്തിയിരുന്നത്. സംഘപരിവാർ ആഭിമുഖ്യമുള്ള അധ്യാപക സംഘടനാ നേതാവാണ് അസോസിയേഷൻ ഭാരവാഹിയെന്നും അദ്ദേഹമാണ് ഈ ചോദ്യം തയ്യാറാക്കിയതെന്നുമാണ് ഉയർന്നുവരുന്ന പരാതി. അസിസ്റ്റന്റ് എജ്യുക്കേഷൻ ഓഫീസർ (AEO) വഴിയാണ് വിവാദമായ ഈ ചോദ്യാവലി സ്കൂളുകളിലേക്ക് കൈമാറിയത്.
എൽ.പി സ്കൂൾ കുട്ടികൾക്കായി നടത്തുന്ന സ്വാതന്ത്ര്യദിന ക്വിസിലൂടെ വി.ഡി. സവർക്കറെ പുകഴ്ത്താനും ചരിത്രത്തെ വികലമായി ചിത്രീകരിക്കാനും ശ്രമം നടന്നുവെന്ന് ആരോപിച്ച് വിവിധ കോണുകളിൽ നിന്ന് ശക്തമായ പ്രതിഷേധമാണ് ഉയരുന്നത്.
