ഇടത് മുന്നണിയില്‍ വീണ്ടും പിളർപ്പ്; സിപിഐ നിലപാടുകളില്‍ സിപിഎം പ്രതിരോധത്തിലേക്ക്?

Jaihind TV Web Desk

February 19, 2025

1 min read • Updated: June 06, 2026

ഇടത് മുന്നണിയില്‍ വീണ്ടും പിളർപ്പ്; സിപിഐ നിലപാടുകളില്‍ സിപിഎം പ്രതിരോധത്തിലേക്ക്?

സർക്കാരിന് എതിരെ വീണ്ടും സിപിഐ . കിഫ്ബി വഴി നിർമ്മിച്ച റോഡുകളിൽ ടോൾ ഏർപ്പെടുത്താനുള്ള സർക്കാരിന്‍റെ നീക്കം സിപിഐ ശക്തമായി എതിർക്കും. ഇന്നത്തെ ഇടതുമുന്നണി യോഗത്തിൽ ഈ വിഷയത്തിൽ സിപിഐ തന്‍റെ വിയോജിപ്പ് ശക്തമായി ഉന്നയിക്കുമെന്ന് വ്യക്തമാണ്. ടോൾ ചുമത്താനുളള സർക്കാരിന്‍റെ നിർബന്ധിത നിലപാട് സിപിഐക്ക് മനസിലാകുന്നുണ്ടെങ്കിലും, ഇത് ജനങ്ങൾക്ക് ഫലപ്രദമായി അവതരിപ്പിക്കണമെന്ന് പാർട്ടി അഭിപ്രായപ്പെടുന്നു. കേന്ദ്ര സർക്കാരിന്‍റെ സാമ്പത്തിക നയങ്ങളാണ് സംസ്ഥാനത്തെ ഈ വിധം ബാധ്യതയിലേക്ക് തള്ളിയതെന്ന വസ്തുത ജനങ്ങളോട് വ്യക്തമാക്കണമെന്ന് സിപിഐ മുന്നറിയിപ്പ് നൽകുന്നു. ഇത് തെരഞ്ഞെടുപ്പിൽ തിരിച്ചടിയാകുമെന്ന ഭയം സിപിഐക്കുണ്ട്. സർക്കാർ ടോൾ നടപടിയിൽ നിന്ന് പിൻമാറില്ലെന്ന നയമാണ് ഇപ്പോൾ ലഭ്യമാകുന്നത്. എന്നാൽ തിരഞ്ഞെടുപ്പ് കണക്കിലെടുത്ത് ഇത് തൽക്കാലം നീട്ടിവയ്ക്കുമോ ഇല്ലയോ എന്ന ആശങ്കയിലാണ് സിപിഐ. ഇന്നത്തെ യോഗം ഇതിന് വ്യക്തത നൽകും. സ്വകാര്യ സർവ്വകലാശാലാ ബില്ലിലെ സിപിഐ നിലപാട് CPM-നെ സമ്മർദ്ദത്തിലാക്കും എന്നും ഉറപ്പാണ്. നിയമസഭയുടെ സെലക്ട് കമ്മിറ്റിക്ക് സ്വകാര്യ സർവ്വകലാശാലാ ബിൽ വിടണമെന്ന സിപിഐയുടെ ആവശ്യം സിപിഎമ്മിനെ കുഴക്കുന്നു. പ്രതിപക്ഷവും ഇതേ ആവശ്യമുന്നയിച്ചതോടെ സർക്കാർ കൂടുതൽ സമ്മർദ്ദത്തിലാകുമെന്ന് വ്യക്തം. മാർച്ച് 3ന് നിയമസഭയിൽ ബിൽ അവതരിപ്പിക്കാനാണ് സർക്കാരിന്‍റെ തീരുമാനം. എന്നാൽ മുന്നണിക്കുള്ളിലെ എതിർപ്പ് അതിനെ കൂടുതൽ അവ്യക്തമാക്കുന്നു. തുടർച്ചയായ വിമർശനങ്ങൾക്കും തർക്കങ്ങൾക്കും ശേഷം, ഇടതുമുന്നണിയിൽ വീണ്ടും ആന്തരിക സമ്മർദ്ദം ഉയരുകയാണ്. ബ്രൂവറി വിഷയത്തിൽ സർക്കാർ നിലപാടിനെതിരെ സംസാരിച്ച സിപിഐ, ടോൾ വിഷയത്തിലും സ്വകാര്യ സർവകലാശാലാ ബില്ലിലും ശക്തമായ എതിർപ്പ് പ്രകടിപ്പിച്ചിരിക്കുകയാണ്. ഇത് മുന്നണിയിൽ പുതിയ വിവാദങ്ങൾക്ക് വഴി വിടുമോ? ഇതിന് ഉത്തരം നൽകുന്നത് ഇന്നത്തെ ഇടതുമുന്നണി യോഗം ആയിരിക്കുമെന്ന് വിലയിരുത്താം.