ഡിജിറ്റൽ ലോകത്ത് കൗതുകം തോന്നി തുറക്കുന്ന ഓരോ ലിങ്കും സുരക്ഷിതമായിരിക്കണമെന്നില്ല. സോഷ്യൽ മീഡിയ പ്ലാറ്റ്‌ഫോമുകളിൽ വ്യാപകമായി പ്രചരിക്കുന്ന Kexart.com എന്ന വെബ്സൈറ്റിനെതിരെ ഇപ്പോൾ സൈബർ സുരക്ഷാ വിദഗ്ധർ മുന്നറിയിപ്പ് നൽകുകയാണ്. ആളുകളെ ഞെട്ടിക്കാനും പൊതുസ്ഥലങ്ങളിൽ നാണക്കേടിലാക്കാനും ലക്ഷ്യമിട്ട് രൂപകൽപ്പന ചെയ്ത ഒരു വൈറൽ പ്രാങ്ക് (Jumpscare) വെബ്സൈറ്റാണിതെന്നാണ് റിപ്പോർട്ടുകൾ.
ഇൻസ്റ്റഗ്രാം , എക്സ് തുടങ്ങിയ പ്ലാറ്റ്‌ഫോമുകളിലൂടെ കൗതുകം ജനിപ്പിക്കുന്ന പോസ്റ്റുകളുടെയും വീഡിയോകളുടെയും രൂപത്തിലാണ് ഈ വെബ്സൈറ്റ് പ്രചരിക്കുന്നത്. ഡിജിറ്റൽ ആർട്ട് ഗാലറിയോ സ്പോർട്സ് വെയർ വിൽക്കുന്ന ഓൺലൈൻ സ്റ്റോറോ ആണെന്ന തോന്നൽ സൃഷ്ടിച്ചാണ് ഉപയോക്താക്കളെ സൈറ്റിലേക്ക് ആകർഷിക്കുന്നത്.
എന്നാൽ സൈറ്റിലെ 'View Gallery' പോലുള്ള ഓപ്ഷനുകളിൽ ക്ലിക്ക് ചെയ്താൽ മുന്നറിയിപ്പില്ലാതെ അതിശക്തമായ ശബ്ദത്തിൽ അശ്ലീല ഓഡിയോയോ ഭയപ്പെടുത്തുന്ന ശബ്ദങ്ങളോ പ്ലേ ചെയ്യുന്നതാണ് പ്രധാന പ്രാങ്ക്. ശബ്ദം പെട്ടെന്ന് നിയന്ത്രിക്കാനോ കുറയ്ക്കാനോ സാധിക്കാത്തതിനാൽ പൊതുസ്ഥലങ്ങളിലോ ഓഫീസുകളിലോ യാത്രയ്ക്കിടയിലോ സൈറ്റ് തുറക്കുന്നവർ വലിയ നാണക്കേടിലാകാൻ സാധ്യതയുണ്ട്. ഹെഡ്ഫോൺ ഉപയോഗിക്കുന്നവർക്കും അതിശക്തമായ ശബ്ദം അസ്വസ്ഥത സൃഷ്ടിക്കാമെന്നും മുന്നറിയിപ്പുണ്ട്.
ഇതോടൊപ്പം, സ്ക്രീനിൽ അതിവേഗം മിന്നിമറയുന്ന ദൃശ്യങ്ങളും (Flashing Effects) പ്രത്യക്ഷപ്പെടാം. ഇത് ചിലർക്ക് അസ്വസ്ഥതയോ മാനസിക ബുദ്ധിമുട്ടുകളോ ഉണ്ടാക്കാൻ സാധ്യതയുള്ളതായും വിലയിരുത്തപ്പെടുന്നു.
വെബ്സൈറ്റ് സുരക്ഷിതമാണോ?
നിലവിൽ ഈ വെബ്സൈറ്റിൽ നിന്ന് വൈറസുകളോ മാൽവെയറുകളോ നേരിട്ട് കണ്ടെത്തിയതായി സ്ഥിരീകരണമില്ല. എന്നിരുന്നാലും ഉപയോക്താക്കളെ തെറ്റിദ്ധരിപ്പിക്കുകയും അസ്വസ്ഥത സൃഷ്ടിക്കുകയും ചെയ്യുന്ന സംശയാസ്പദമായ വെബ്സൈറ്റായാണ് നിരവധി സൈബർ സുരക്ഷാ നിരീക്ഷകർ ഇതിനെ വിലയിരുത്തുന്നത്.
വെബ്സൈറ്റിന്റെ ഉടമസ്ഥാവകാശ വിവരങ്ങൾ വ്യക്തമായി ലഭ്യമല്ലെന്നും രജിസ്ട്രേഷനായി സൗജന്യ ഇമെയിൽ സേവനങ്ങൾ ഉപയോഗിച്ചിട്ടുണ്ടെന്നുമാണ് റിപ്പോർട്ടുകൾ. പുതുതായി രജിസ്റ്റർ ചെയ്ത ഡൊമെയ്ൻ ആയതിനാലും വിശ്വാസ്യത സംബന്ധിച്ച വിവരങ്ങളുടെ അഭാവം മൂലവും വിവിധ സുരക്ഷാ പരിശോധനാ പ്ലാറ്റ്‌ഫോമുകളിൽ ഇതിന് കുറഞ്ഞ ട്രസ്റ്റ് സ്കോറാണ് ലഭിച്ചിരിക്കുന്നത്.
അബദ്ധത്തിൽ തുറന്നാൽ എന്ത് ചെയ്യണം?
ഈ വെബ്സൈറ്റിൽ ഉപയോഗിച്ചിരിക്കുന്ന ചില ബ്രൗസർ സ്ക്രിപ്റ്റുകൾ കാരണം ഓഡിയോ ഉടൻ നിർത്താനോ ടാബ് എളുപ്പത്തിൽ അടയ്ക്കാനോ ചിലപ്പോൾ ബുദ്ധിമുട്ട് അനുഭവപ്പെടാം. ചില സാഹചര്യങ്ങളിൽ ബ്രൗസർ മിനിമൈസ് ചെയ്താലും ശബ്ദം തുടരാൻ സാധ്യതയുണ്ട്.
അത്തരം സാഹചര്യങ്ങളിൽ ഫോൺ അല്ലെങ്കിൽ കമ്പ്യൂട്ടർ റീസ്റ്റാർട്ട് ചെയ്യുകയോ ആവശ്യമായാൽ പവർ ഓഫ് ചെയ്യുകയോ ചെയ്യുന്നതാണ് വേഗത്തിൽ പ്രശ്നം പരിഹരിക്കാൻ സഹായിക്കുക. കൂടാതെ പരിചയമില്ലാത്ത ലിങ്കുകൾ തുറക്കുന്നതിന് മുമ്പ് അവയുടെ വിശ്വാസ്യത ഉറപ്പാക്കുകയും പൊതുസ്ഥലങ്ങളിൽ അജ്ഞാത വെബ്സൈറ്റുകൾ സന്ദർശിക്കുന്നത് ഒഴിവാക്കുകയും ചെയ്യണമെന്ന് സൈബർ സുരക്ഷാ വിദഗ്ധർ നിർദേശിക്കുന്നു.
