സംസ്ഥാനത്തെ പൊലീസ് ഉദ്യോഗസ്ഥരുടെ ഓണം ഡ്യൂട്ടി അലവൻസ് സർക്കാർ വർധിപ്പിച്ചു. 500 രൂപയായിരുന്ന അലവൻസ് 1000 രൂപയാക്കിയാണ് ഇരട്ടിയാക്കിയത്. ഓണത്തിന് മുന്നോടിയായി വിവിധ വിഭാഗങ്ങൾക്ക് വിപുലമായ സാമ്പത്തിക സഹായങ്ങൾ മുഖ്യമന്ത്രി പ്രഖ്യാപിച്ചതിന് പിന്നാലെയാണ് പോലീസ് ഉദ്യോഗസ്ഥർക്കുള്ള ഈ ആനുകൂല്യ വർധനവും പുറത്തുവന്നത്.
സാമൂഹിക ക്ഷേമ പെൻഷൻ ഗുണഭോക്താക്കൾക്കുള്ള ധനസഹായ വിതരണം ഈ മാസം 19 മുതൽ ആരംഭിക്കും. ഇതിനായി 1105 കോടി രൂപയാണ് സർക്കാർ അനുവദിച്ചിട്ടുള്ളത്. കൂടാതെ, സംസ്ഥാനത്തെ സർക്കാർ ജീവനക്കാർക്കും അധ്യാപകർക്കും 4500 രൂപ ബോണസും 20,000 രൂപ ഓണം അഡ്വാൻസും നൽകും. ആശാ പ്രവർത്തകർക്കും അങ്കണവാടി ജീവനക്കാർക്കും പ്രത്യേക സഹായമായി 1450 രൂപ വീതം ലഭിക്കും.
തൊഴിലുറപ്പ് തൊഴിലാളികൾക്ക് ഓണക്കാല ആശ്വാസ ധനമായി 1200 രൂപ വീതം നൽകാൻ തീരുമാനമായിട്ടുണ്ട്. ഇതിനുപുറമേ, പിന്നാക്ക വിഭാഗങ്ങൾക്കുള്ള പെൻഷൻ കുടിശികയും നെല്ല് സംഭരണവുമായി ബന്ധപ്പെട്ട തുകയും വിതരണം ചെയ്യും. പാചകത്തൊഴിലാളികൾക്ക് പുതുക്കിയ നിരക്കിലുള്ള വേതനം ഉറപ്പാക്കുന്നതിനൊപ്പം, അങ്കണവാടി ജീവനക്കാരുടെ കുടിശിക തീർപ്പാക്കുന്നതിനായി 34 കോടി രൂപയും സർക്കാർ അനുവദിച്ചിട്ടുണ്ട്.
