കാട്ടാന ആക്രമണങ്ങള്‍ തുടരുന്നു; സർക്കാർ നോക്കുകുത്തി: വയനാട്ടില്‍ യുഡിഎഫ് ഹർത്താല്‍

Jaihind TV Web Desk

February 12, 2025

1 min read • Updated: June 04, 2026

കാട്ടാന ആക്രമണങ്ങള്‍ തുടരുന്നു; സർക്കാർ നോക്കുകുത്തി: വയനാട്ടില്‍ യുഡിഎഫ് ഹർത്താല്‍

വയനാട്: വന്യജീവി ആക്രമണങ്ങൾ ക്രമാതീതമായി ഉയരുന്ന സാഹചര്യത്തിൽ സർക്കാരിന്‍റെ അനാസ്ഥയില്‍ പ്രതിഷേധിച്ച് വയനാട്ടിൽ യുഡിഎഫ് ഹർത്താൽ പ്രഖ്യാപിച്ചു. വ്യാഴാഴ്‌ച രാവിലെ 6 മുതൽ വൈകിട്ട് 6 വരെ ജില്ലയിൽ ഹർത്താൽ പ്രാബല്യത്തിലുണ്ടാകും. എന്നാൽ അത്യാവശ്യ സേവനങ്ങളും നേരത്തെ നിശ്ചയിച്ചിരിക്കുന്ന പരീക്ഷകളും വിവാഹങ്ങളും പെരുനാളുകളും ഹർത്താൽ ഒഴിവാക്കിയതായി സംഘാടകർ അറിയിച്ചു. യുഡിഎഫ് ജില്ലാ ചെയർമാൻ കെ.കെ. അഹമ്മദ് ഹാജിയും കൺവീനർ പി.ടി. ഗോപാലകുറുപ്പും സംയുക്തമായി നടത്തിയ വാർത്താസമ്മേളനത്തിലാണ് ഹർത്താലിന്‍റെ വിശദാംശങ്ങൾ വ്യക്തമാക്കിയത്. വന്യജീവി ആക്രമണങ്ങൾ തുടരുന്നതിനും മനുഷ്യ ജീവൻ നഷ്ടപ്പെടുന്നതിനും മറവായി സർക്കാർ ശക്തമായ നടപടികൾ സ്വീകരിക്കുന്നില്ലെന്നു നേതാക്കൾ കുറ്റപ്പെടുത്തി. കഴിഞ്ഞ രണ്ടു ദിവസത്തിനിടെ നടന്ന കാട്ടാന ആക്രമണങ്ങളിൽ രണ്ട് പേരാണ് കൊല്ലപ്പെട്ടത്. ചൊവ്വാഴ്ച രാത്രി അട്ടമലയിലും തിങ്കളാഴ്ച വൈകിട്ട് നൂൽപ്പുഴയിലും ഉണ്ടായ സംഭവങ്ങളാണ് നാടിനെ ഞെട്ടിച്ചത്. അടുത്ത 43 ദിവസത്തിനിടെ നാല് പേരാണ് വയനാട്ടിൽ വന്യമൃഗങ്ങളുടെ ആക്രമണത്തിൽ ജീവൻ നഷ്ടപ്പെടുത്തിയത്. “വന്യജീവി ആക്രമണങ്ങൾ ദിനംപ്രതി നടക്കുമ്പോഴും സർക്കാരിന്‍റെ ഭാഗത്ത് നിന്ന് കർശനമായ പ്രതികരണം കാണാൻ കഴിയുന്നില്ല. ഇതിനെതിരെ ശക്തമായ പ്രതിഷേധം അത്യാവശ്യമാണ്” – യുഡിഎഫ് നേതാക്കൾ വ്യക്തമാക്കി.