മുംബൈ: മൂന്ന് പതിറ്റാണ്ടിലേറെയായി ബോളിവുഡിലെ സൂപ്പർതാരമായി തിളങ്ങുന്ന ഷാറുഖ് ഖാന്റെ അഭിനയവും സ്ക്രീൻ പ്രെസൻസും പോലെ തന്നെ ആരാധകരെ എന്നും അത്ഭുതപ്പെടുത്തുന്ന ഒന്നാണ് അദ്ദേഹത്തിന്റെ ഫിറ്റ്‌നസും നിത്യയൗവനവും. അത്യാധുനിക ഡയറ്റ് ട്രെൻഡുകളോ സങ്കീർണമായ വെൽനസ് പ്ലാനുകളോ പിന്തുടരുന്നതിനേക്കാൾ കൃത്യമായ അച്ചടക്കവും സ്ഥിരതയുമാണ് തന്റെ ആരോഗ്യരഹസ്യമെന്ന് ഷാറുഖ് പല അഭിമുഖങ്ങളിലും വ്യക്തമാക്കിയിട്ടുണ്ട്.
2024-ൽ ഒരു അഭിമുഖത്തിലാണ് ഷാറുഖ് ഖാൻ തന്റെ വ്യത്യസ്തമായ ഭക്ഷണശീലം പങ്കുവെച്ചത്. സാധാരണയായി ദിവസത്തിൽ ഒരു നേരം മാത്രമാണ് താൻ ഭക്ഷണം കഴിക്കാറുള്ളതെന്ന് താരം വെളിപ്പെടുത്തി. ഇത് പ്രത്യേക ഇന്റർമിറ്റന്റ് ഫാസ്റ്റിങ്ങിന്റെയോ ഡോക്ടർമാരുടെ നിർദേശപ്രകാരമുള്ള ഡയറ്റിന്റെയോ ഭാഗമല്ലെന്നും, വ്യക്തിപരമായ ജീവിതശൈലിയുടെ ഭാഗമായാണ് ഇത്തരമൊരു ശീലം രൂപപ്പെട്ടതെന്നും അദ്ദേഹം പറഞ്ഞു. രാത്രി വൈകിയും നീളുന്ന സിനിമാ ഷൂട്ടിങ്ങുകളും തിരക്കേറിയ ജോലി സമയക്രമവുമാണ് ഈ ഭക്ഷണരീതി പിന്തുടരാൻ പ്രധാന കാരണമായതെന്നും താരം വ്യക്തമാക്കിയിട്ടുണ്ട്.
അതേസമയം, ഷാറുഖിന്റെ ഭക്ഷണക്രമം എല്ലാവരും അനുകരിക്കരുതെന്ന് പോഷകാഹാര വിദഗ്ധർ മുന്നറിയിപ്പ് നൽകുന്നു. സെലിബ്രിറ്റികളുടെ ഡയറ്റുകൾ അവരുടെ ശരീരഘടന, കഠിനമായ വ്യായാമം, ആരോഗ്യവിദഗ്ധരുടെ മേൽനോട്ടം എന്നിവ കണക്കിലെടുത്താണ് ക്രമീകരിക്കുന്നത്. അതിനാൽ ദിവസം ഒരു നേരം മാത്രം ഭക്ഷണം കഴിക്കുന്നത് സാധാരണക്കാരായ ഭൂരിഭാഗം ആളുകൾക്കും ആവശ്യമായ പോഷകങ്ങൾ ലഭ്യമാക്കണമെന്നില്ല.
ഭക്ഷണത്തിൽ വൈവിധ്യം പരീക്ഷിക്കാൻ ഇഷ്ടപ്പെടാത്ത ആളാണ് ഷാറുഖ്. വർഷം മുഴുവൻ ഒരേ ഭക്ഷണം കഴിക്കേണ്ടി വന്നാലും തനിക്ക് അതിൽ പ്രശ്‌നമില്ലെന്ന് താരം നേരത്തേ പറഞ്ഞിട്ടുണ്ട്. ഗ്രിൽ ചെയ്ത ചിക്കൻ, ബ്രോക്കോളി, മുളപ്പിച്ച ധാന്യങ്ങൾ, ചെറിയ അളവിൽ അണ്ടിപ്പരിപ്പ് എന്നിവയാണ് പ്രധാനമായും അദ്ദേഹത്തിന്റെ ഭക്ഷണത്തിലുള്ളത്. ശരീരത്തിന് ആവശ്യമായ പ്രോട്ടീനും മറ്റ് പോഷകങ്ങളും ഈ ഭക്ഷണത്തിലൂടെ ലഭിക്കുന്നുവെന്നാണ് താരം പറയുന്നത്.
ഇന്ത്യയിലെ ഏറ്റവും സമ്പന്നരായ സിനിമാതാരങ്ങളിൽ ഒരാളായിട്ടും ആഡംബര ഭക്ഷണങ്ങളേക്കാൾ ലളിതമായ വീട്ടുഭക്ഷണത്തോടാണ് ഷാറുഖിന് കൂടുതൽ താൽപ്പര്യം. സിനിമാ ഷൂട്ടിങ്ങിനിടയിലും സെറ്റിലെ ഭക്ഷണത്തിന് പകരം വീട്ടിൽ തയ്യാറാക്കിയ ഭക്ഷണമാണ് അദ്ദേഹം കൊണ്ടുപോകാറുള്ളത്. തന്തൂരി ചിക്കൻ അല്ലെങ്കിൽ മത്സ്യം, പച്ചക്കറികൾ, മുളപ്പിച്ച ബീൻസ് എന്നിവയാണ് പതിവ് ഉച്ചഭക്ഷണം.
ഷാറുഖ് ഖാന്റെ ഭക്ഷണശീലങ്ങളിൽ ഏറ്റവും കൂടുതൽ ചർച്ചയായിട്ടുള്ള മറ്റൊരു കാര്യമാണ് ബ്ലാക്ക് കോഫിയോടുള്ള അദ്ദേഹത്തിന്റെ പ്രിയം. ഒരു ദിവസം 30 കപ്പ് വരെ ബ്ലാക്ക് കോഫി കുടിക്കാറുണ്ടെന്നും വെള്ളം വളരെ കുറച്ചേ കുടിക്കാറുള്ളൂവെന്നും താരം ഒരിക്കൽ തമാശയായി പറഞ്ഞിരുന്നു. അത് അതിശയോക്തി കലർന്ന പരാമർശമായിരുന്നെങ്കിലും കോഫിയോടുള്ള അദ്ദേഹത്തിന്റെ ഇഷ്ടം ആരാധകർക്കിടയിൽ സുപരിചിതമാണ്.
കർശനമായ ഭക്ഷണക്രമം പിന്തുടരുമ്പോഴും ഇഷ്ടപ്പെട്ട വിഭവങ്ങളെ ഷാറുഖ് ജീവിതത്തിൽ നിന്ന് പൂർണമായി മാറ്റിനിർത്തിയിട്ടില്ല. യാത്രകളിലോ സുഹൃത്തുക്കളുമായുള്ള ഒത്തുചേരലുകളിലോ ബിരിയാണി, പൊറോട്ട, റൊട്ടി, നെയ്യ് ചേർത്ത വിഭവങ്ങൾ, ലസ്സി തുടങ്ങിയവ ആസ്വദിക്കാൻ തനിക്ക് ഇഷ്ടമാണെന്ന് താരം തുറന്ന് പറഞ്ഞിട്ടുണ്ട്.
കൃത്യമായ അച്ചടക്കവും ലളിതമായ ഭക്ഷണശീലവും സ്ഥിരമായ ജീവിതക്രമവുമാണ് ഷാറുഖ് ഖാന്റെ ഫിറ്റ്‌നസിന് പിന്നിലെ പ്രധാന ഘടകങ്ങളെന്നാണ് അദ്ദേഹത്തിന്റെ വെളിപ്പെടുത്തലുകൾ സൂചിപ്പിക്കുന്നത്.
