നീറ്റ് പരീക്ഷാ ക്രമക്കേടുമായി ബന്ധപ്പെട്ട് സിജെപി വിദ്യാർത്ഥി പ്രക്ഷോഭത്തെ തുടർന്ന് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെച്ച സംഭവത്തിൽ തമാശരൂപേണ പ്രതികരിച്ച് നടൻ ചന്തു സലിംകുമാർ. വിഷയത്തിൽ നേരത്തെ നിലപാട് വ്യക്തമാക്കി രംഗത്തുവന്ന ബി.ജെ.പി നേതാവും നടനുമായ കൃഷ്ണകുമാറിനെയും അവതാരകയും നടിയുമായ പേളി മാണിയെയും പരിഹസിച്ചാണ് ചന്തു തന്റെ ഇൻസ്റ്റഗ്രാം സ്റ്റോറി പങ്കുവെച്ചത്.
കാവി നിറത്തിലുള്ള ബാക്ഗ്രൗണ്ടിലാണ് ചന്തു തന്റെ കുറിപ്പ് പങ്കുവെച്ചത്. "കശ്മീരിൽ കല്ലേറ് നിർത്തിച്ചവർ, ഡൽഹിയിൽ കല്ലേറ് നിർത്തിക്കാൻ വന്നിട്ട് തിരിച്ചു പോയീന്ന് കേട്ടു, ശരിയാണോ ഗയ്സ്?" എന്നായിരുന്നു ചന്തുവിന്റെ ഇൻസ്റ്റഗ്രാം പോസ്റ്റ്. കൂടാതെ 'കാവി എന്റെ ഇഷ്ട നിറം' എന്നും തമാശയായി അദ്ദേഹം ഈ പോസ്റ്റിൽ കുറിച്ചിട്ടുണ്ട്.
പ്രധാനമന്ത്രി നരേന്ദ്ര മോദിയുടെ ചിത്രം പങ്കുവെച്ചുകൊണ്ട് കഴിഞ്ഞ ദിവസം കൃഷ്ണകുമാർ പങ്കുവെച്ച ഒരു പോസ്റ്റിനെ മുൻനിർത്തിയാണ് ചന്തുവിന്റെ പരിഹാസം. "കശ്മീരിലെ കല്ലേറ് നിർത്താൻ അറിയാമെങ്കിൽ... പിന്നെയാ ഡൽഹി..." എന്നായിരുന്നു കൃഷ്ണകുമാറിന്റെ പോസ്റ്ററിലെ വാചകങ്ങൾ. ഈ പോസ്റ്റിനെതിരെ സോഷ്യൽ മീഡിയയിൽ വലിയ രീതിയിലുള്ള വിമർശനങ്ങൾ ഉയർന്നിരുന്നു.
കൃഷ്ണകുമാറിന് പിന്നാലെ സിജെപി സമരത്തിനെതിരെ പേളി മാണിയും രംഗത്തെത്തിയിരുന്നു. അക്രമങ്ങളിൽ നിന്ന് വിദ്യാർത്ഥികൾ പിന്മാറണമെന്നും ജീവനാണ് പ്രാധാന്യമെന്നും ചൂണ്ടിക്കാട്ടി പേളി പങ്കുവെച്ച കുറിപ്പാണ് ആളുകളെ ചൊടിപ്പിച്ചത്. ഇതിനുപുറമേ, അതിവേഗ കോടതികൾ സ്ഥാപിക്കുമെന്ന പ്രധാനമന്ത്രിയുടെ പ്രസ്താവനയും പേളി സ്റ്റാറ്റസായി പങ്കുവെച്ചിരുന്നു.
വിമർശനം ശക്തമായതോടെ പ്രധാനമന്ത്രിയുടെ പോസ്റ്റ് ഡിലീറ്റ് ചെയ്ത പേളി, 'കാവി നിറമാണ് തന്റെ പ്രിയപ്പെട്ട നിറം' എന്ന് മറ്റൊരു സ്റ്റാറ്റസ് ഇടുകയും ചെയ്തു. എന്നാൽ ഇതിനെതിരെ കടുത്ത സൈബർ ആക്രമണവും ഫോളോവേഴ്സിന്റെ കൊഴിഞ്ഞുപോക്കും നേരിട്ടതോടെ പേളി ഈ സ്റ്റാറ്റസുകളും നീക്കം ചെയ്ത് നിലപാട് മയപ്പെടുത്തുകയായിരുന്നു. എങ്കിലും ഇൻസ്റ്റഗ്രാമിലും യുട്യൂബിലും നിരവധി ഫോളോവേഴ്സിനെയാണ് പേളിക്ക് ഈ സംഭവത്തോടെ നഷ്ടമായത്.
