തമിഴ്‌നാട്ടിലെ തേനി ജില്ലാ ജയിലിൽ തടവുകാർ ചാടിപ്പോയ സംഭവത്തിൽ ഒളിവിലുള്ള അഞ്ച് ക്രിമിനലുകൾക്കായുള്ള തിരച്ചിൽ പോലീസ് ശക്തമാക്കി. തിങ്കളാഴ്ച രാത്രി പത്തു മണിയോടെയാണ് പോലീസിനെ ഞെട്ടിച്ച ജയിൽ ചാട്ടം നടന്നത്. സംഭവത്തിന് ശേഷം നടത്തിയ ഊർജ്ജിത തിരച്ചിലിൽ മണിക്കൂറുകൾക്കുള്ളിൽ തന്നെ ഒരാളെ പിടികൂടിയിരുന്നു. തുടർന്ന് കഴിഞ്ഞ ദിവസം വിവിധ ഇടങ്ങളിൽ നിന്നായി 12 പേരെക്കൂടി പോലീസ് വലയിലാക്കി.
പിടിയിലായ പ്രതികളിൽ എട്ടു പേരെ ഉടൻ കോടതിയിൽ ഹാജരാക്കും. കടുത്ത കുറ്റകൃത്യങ്ങളിൽ പങ്കാളികളായ അഞ്ച് ക്രിമിനലുകളെ വിശദമായി ചോദ്യം ചെയ്യുന്നതിനായി പോലീസ് കസ്റ്റഡിയിൽ വാങ്ങും. ജയിലിന്റെ സുരക്ഷാ ക്രമീകരണങ്ങളിലെ വലിയ വീഴ്ചയാണ് ഈ സംഭവത്തോടെ പുറത്തുവന്നിരിക്കുന്നത്.
തടവുകാർക്ക് ജയിൽ ചാടാൻ ഉദ്യോഗസ്ഥരുടെ ഭാഗത്തുനിന്ന് എന്തെങ്കിലും തരത്തിലുള്ള സഹായം ലഭിച്ചിട്ടുണ്ടോ എന്ന കാര്യവും അന്വേഷണ സംഘം പരിശോധിച്ചുവരികയാണ്. ജയിലിലെ സി.സി.ടി.വി ദൃശ്യങ്ങളും ഡ്യൂട്ടിയിലുണ്ടായിരുന്ന ജീവനക്കാരുടെ വിവരങ്ങളും അടിസ്ഥാനമാക്കിയാണ് നിലവിൽ അന്വേഷണം പുരോഗമിക്കുന്നത്.
തേനി ജില്ലാ ജയിൽ ചാട്ടം: വൻ സുരക്ഷാ വീഴ്ചയെന്ന് വിലയിരുത്തൽ; അഞ്ചുപേർക്കായി തിരച്ചിൽ ഊർജ്ജിതം
Jaihind TV News Report
Jaihind TV Web Desk
2 min read
134 reads
