ചെന്നൈ: പ്രണയത്തെയും വിവാഹബന്ധത്തെയും കുറിച്ചുള്ള തന്റെ കാഴ്ചപ്പാടുകൾ പങ്കുവെച്ച് തമിഴ് താരം സൂര്യ ശിവകുമാർ. പുതിയ ചിത്രമായ ‘വിശ്വനാഥ് ആൻഡ് സൺസ്’ എന്ന സിനിമയുടെ ഓഡിയോ ലോഞ്ച് ചടങ്ങിൽ സംസാരിക്കവെയാണ് താരം ദാമ്പത്യബന്ധത്തെക്കുറിച്ചുള്ള തന്റെ നിലപാടുകൾ വ്യക്തമാക്കിയത്.
പ്രണയം വിവാഹത്തോടെ അവസാനിക്കുന്ന ഒന്നല്ലെന്നും ജീവിതത്തിലുടനീളം അത് നിലനിർത്തേണ്ടതാണെന്നും സൂര്യ പറഞ്ഞു. താലികെട്ടുന്നതോടെ പ്രണയത്തിന്റെ ഉത്തരവാദിത്തം അവസാനിക്കുന്നില്ലെന്നും മറിച്ച് ഓരോ ദിവസവും പങ്കാളിയെ സ്‌നേഹിക്കുകയും ബഹുമാനിക്കുകയും ചെയ്യേണ്ടതുണ്ടെന്നും അദ്ദേഹം വ്യക്തമാക്കി.
“പ്രണയം എന്നും നിലനിൽക്കേണ്ട ഒന്നാണ്. വിവാഹം കഴിഞ്ഞതോടെ അത് അവസാനിക്കരുത്. ഒരുമിച്ച് 20 വർഷം ജീവിച്ചാലും പങ്കാളിയോടുള്ള സ്‌നേഹം അതേപോലെ തുടരേണ്ടതാണ്. എല്ലായ്പ്പോഴും പരസ്പരം ബഹുമാനിക്കണം,” സൂര്യ പറഞ്ഞു.
പ്രായം കൂടുന്നതിനനുസരിച്ച് മനുഷ്യരുടെ ചിന്തകളിലും മുൻഗണനകളിലും സ്വാഭാവികമായ മാറ്റങ്ങൾ ഉണ്ടാകുമെന്നും താരം ചൂണ്ടിക്കാട്ടി. 20, 25, 30 വയസ്സുകളിലെ ജീവിത സാഹചര്യങ്ങളും കാഴ്ചപ്പാടുകളും വ്യത്യസ്തമായിരിക്കാം. എന്നാൽ ജീവിത പങ്കാളിയോടുള്ള സ്‌നേഹവും കരുതലും മാറാതെ തുടരണമെന്നാണ് തന്റെ വിശ്വാസമെന്നും സൂര്യ കൂട്ടിച്ചേർത്തു.
കുടുംബത്തിലും സമൂഹത്തിലും സ്ത്രീകൾ വഹിക്കുന്ന നിർണായക പങ്കിനെക്കുറിച്ചും ചടങ്ങിൽ താരം സംസാരിച്ചു. ജീവിതത്തിലെ ലക്ഷ്യങ്ങൾ നേടുന്നതിനായി പുരുഷന്മാരേക്കാൾ കൂടുതൽ വെല്ലുവിളികൾ പലപ്പോഴും സ്ത്രീകൾ നേരിടേണ്ടി വരുന്നതായി അദ്ദേഹം പറഞ്ഞു.
കുടുംബത്തിന്റെ ഉത്തരവാദിത്തങ്ങൾ ഏറ്റെടുക്കുന്നതിലും കുഞ്ഞുങ്ങൾക്ക് ജന്മം നൽകുന്നതിലും സ്ത്രീകൾ വലിയ ത്യാഗങ്ങളാണ് നടത്തുന്നത്. അതിനാൽ അവരുടെ സംഭാവനകളെ എപ്പോഴും ആദരിക്കണമെന്നും സ്‌നേഹത്തോടൊപ്പം ബഹുമാനവും പ്രകടിപ്പിക്കണമെന്നും സൂര്യ വ്യക്തമാക്കി.
വെങ്കി അറ്റ്‌ലൂരി സംവിധാനം ചെയ്യുന്ന ഫാമിലി ഡ്രാമ ചിത്രമായ ‘വിശ്വനാഥ് ആൻഡ് സൺസ്’ ഓഗസ്റ്റ് 14ന് തിയേറ്ററുകളിലെത്തും. സൂര്യയ്‌ക്കൊപ്പം മമിത ബൈജുവും ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നു. രാധിക ശരത്കുമാർ, രവീണ ടണ്ഠൻ, നാസർ, സുധ, കല്യാണി നടരാജൻ തുടങ്ങിയവരാണ് ചിത്രത്തിലെ മറ്റ് പ്രധാന താരങ്ങൾ. ജി.വി. പ്രകാശ് കുമാറാണ് ചിത്രത്തിന് സംഗീതം ഒരുക്കുന്നത്.
