ഡല്‍ഹി: ഷാറൂഖ് ഖാനും ദീപിക പദുകോണും പ്രധാന വേഷങ്ങളിലെത്തുന്ന പുതിയ ആക്ഷന്‍ ത്രില്ലര്‍ ചിത്രം 'കിങ്' റിലീസിന് മുന്‍പേ വിവാദത്തില്‍. ചിത്രത്തിലെ 'തു മില്‍ ജായേ' എന്ന് തുടങ്ങുന്ന ഗാനത്തില്‍ ദീപിക ധരിച്ചിരിക്കുന്ന കാവി വസ്ത്രത്തെച്ചൊല്ലിയാണ് പുതിയ വിവാദം ഉടലെടുത്തിരിക്കുന്നത്. ഗാനത്തിലെ ചില രംഗങ്ങള്‍ സനാതന ധര്‍മ്മത്തെയും മതവികാരങ്ങളെയും വ്രണപ്പെടുത്തുന്നതാണെന്നും ചിത്രം രാജ്യവ്യാപകമായി ബഹിഷ്‌കരിക്കണമെന്നും ആവശ്യപ്പെട്ട് ഡല്‍ഹി ബി.ജെ.പി എം.എല്‍.എ രവി നേഗി രംഗത്തെത്തി.
വിവാദ രംഗങ്ങള്‍ ചിത്രത്തില്‍ നിന്ന് നീക്കം ചെയ്തില്ലെങ്കില്‍ ശക്തമായ പ്രതിഷേധം നേരിടേണ്ടി വരുമെന്നാണ് മുന്നറിയിപ്പ്. സച്ചിന്‍-ജിഗര്‍ സംഗീതസംവിധാനം നിര്‍വഹിച്ച ഗാനം പുറത്തിറങ്ങി ആദ്യ 24 മണിക്കൂറിനുള്ളില്‍ 3.63 കോടിയിലധികം പേരാണ് യൂട്യൂബില്‍ കണ്ടത്.
2023-ല്‍ പുറത്തിറങ്ങിയ 'പത്താന്‍' എന്ന ചിത്രത്തിലെ 'ബേഷരം രംഗ്' എന്ന ഗാനത്തിലും ദീപിക കാവി ബിക്കിനി ധരിച്ചത് സമാനമായ രീതിയില്‍ വന്‍ പ്രതിഷേധങ്ങള്‍ക്ക് വഴിവെച്ചിരുന്നു. തുടര്‍ന്ന് സെന്‍സര്‍ ബോര്‍ഡിന്റെ നിര്‍ദേശപ്രകാരം മാറ്റങ്ങള്‍ വരുത്തിയാണ് പത്താന്‍ തിയേറ്ററുകളിലെത്തിയത്. സിദ്ധാര്‍ത്ഥ് ആനന്ദ് സംവിധാനം ചെയ്യുന്ന 'കിങ്' ഡിസംബര്‍ 24-നാണ് തിയേറ്ററുകളിലെത്തുന്നത്. ഷാറൂഖിന്റെ മകള്‍ സുഹാന ഖാന്‍, അഭിഷേക് ബച്ചന്‍, റാണി മുഖര്‍ജി തുടങ്ങിയ വന്‍ താരനിര തന്നെ ചിത്രത്തില്‍ അണിനിരക്കുന്നുണ്ട്.
'പത്താൻ' പിന്നാലെ ഷാറൂഖിന്റെ 'കിങ്' ചിത്രവും വിവാദത്തിൽ; ദീപികയുടെ കാവി വസ്ത്രത്തിനെതിരെ ബഹിഷ്കരണ ആഹ്വാനവുമായി ബി.ജെ.പി എം.എൽ.എ
Jaihind TV News Report
Jaihind TV Web Desk
2 min read
185 reads
