കത്രീനയ്ക്ക് പിന്തുണ; ബോഡി ഷെയ്മിങ്ങിനും പാപ്പരാസി സംസ്കാരത്തിനുമെതിരെ വേദിയിൽ ടി-ഷർട്ട് അഴിച്ച് മാസ്സ് മറുപടിയുമായി സൽമാൻ ഖാൻ

സോഷ്യൽ മീഡിയയിലൂടെയുള്ള ബോഡി ഷെയ്മിങ്ങിനും ഓൺലൈൻ കടന്നാക്രമണങ്ങൾക്കുമെതിരെ ശക്തമായ ഭാഷയിൽ പ്രതികരിച്ച് നടൻ സൽമാൻ ഖാൻ. പ്രസവാനന്തരം സ്ത്രീകളുടെ ശരീരത്തിലുണ്ടാകുന്ന സ്വാഭാവിക മാറ്റങ്ങളെയും വയസ്സിനെയും ചൊല്ലി നടക്കുന്ന അധിക്ഷേപങ്ങളെ അദ്ദേഹം കടുത്ത ഭാഷയിൽ അപലപിച്ചു. അംബാനി കുടുംബത്തിന്റെ ഗണേശ ചതുർത്ഥി ആഘോഷങ്ങളിൽ പങ്കെടുത്ത നടി കത്രീന കൈഫിന്റെ രൂപത്തെച്ചൊല്ലി സോഷ്യൽ മീഡിയയിൽ ഉയർന്ന അനാവശ്യ വിമർശനങ്ങളുടെ പശ്ചാത്തലത്തിലാണ് താരത്തിന്റെ ഈ ഇടപെടൽ.

'ബിഗ് ബോസ് 20'-ന്റെ ഏറ്റവും പുതിയ 'വീക്കെൻഡ് കാ വാർ' എപ്പിസോഡിലാണ് സൈബർ ബുള്ളിയിങ്ങിന് ഇരയാകുന്നവർക്കായി സൽമാൻ ഖാൻ പരസ്യമായി രംഗത്തെത്തിയത്. തനിക്ക് ഇപ്പോൾ 60 വയസ്സായെന്നും പതിറ്റാണ്ടുകൾക്ക് മുൻപ് 'മേം നെ പ്യാർ കിയ' എന്ന ചിത്രത്തിൽ കണ്ടതുപോലെ എപ്പോഴും കാണപ്പെടാൻ കഴിയില്ലെന്നും താരം ഓർമ്മിപ്പിച്ചു. തുടർന്ന് വേദിയിൽ വെച്ച് തന്റെ തൊപ്പിയും ജാക്കറ്റും ടി-ഷർട്ടും അഴിച്ച്, മേക്കപ്പ് തുടച്ചുമാറ്റി "ഭായ് തടിച്ചു, ഭായിയെ ട്രോൾ ചെയ്യൂ" എന്ന് ട്രോളന്മാരെ പരസ്യമായി വെല്ലുവിളിച്ചുകൊണ്ടാണ് അദ്ദേഹം തന്റെ പ്രതിഷേധം വ്യക്തമാക്കിയത്.

ഒരാളുടെ ശരീരഭാരത്തെയോ, ലുക്കിനെയോ, വയസ്സിനെയോ, അമ്മയാകുന്നതിനെയോ പരിഹസിക്കുന്നത് അവരുടെ വളർത്തലിന്റെ ഗുണനിലവാരമാണ് കാണിക്കുന്നതെന്ന് സൽമാൻ ചൂണ്ടിക്കാട്ടി. ഒരു കലാകാരന്റെ ജോലിയെ വിമർശിക്കുന്നതും വ്യക്തിപരമായി അധിക്ഷേപിക്കുന്നതും തമ്മിൽ വലിയ വ്യത്യാസമുണ്ട്. സിനിമയോ അഭിനയമോ ഇഷ്ടപ്പെട്ടില്ലെങ്കിൽ അത് തുറന്നുപറയാൻ പ്രേക്ഷകർക്ക് അവകാശമുണ്ടെങ്കിലും, ഒരു ടിക്കറ്റ് വാങ്ങുന്നതിലൂടെ ആ നടനെ പണയം വച്ചിട്ടില്ലെന്ന് ട്രോളന്മാർ മനസ്സിലാക്കണമെന്ന് അദ്ദേഹം വ്യക്തമാക്കി.

നടിമാർക്ക് നേരിടേണ്ടി വരുന്ന മോശം പാപ്പരാസി സംസ്കാരത്തെയും സൽമാൻ വിമർശിച്ചു. വാഹനങ്ങളിൽ നിന്ന് ഇറങ്ങുന്ന സമയത്ത് നടിമാരുടെയും കുടുംബാംഗങ്ങളുടെയും ശരീരഭാഗങ്ങളിലേക്ക് ക്യാമറകൾ കേന്ദ്രീകരിക്കുന്നത് തെറ്റായ പ്രവണതയാണെന്ന് അദ്ദേഹം ചോദ്യം ചെയ്തു. പേരെടുത്തുപറഞ്ഞില്ലെങ്കിലും കത്രീന കൈഫിനെ പിന്തുണച്ച താരം, ഗർഭിണിയാകുമ്പോൾ ശരീരത്തിൽ മാറ്റങ്ങൾ വരുന്നത് സ്വാഭാവികമാണെന്നും അത് ആർക്ക് മുന്നിലും തെളിയിക്കേണ്ടതില്ലെന്നും വ്യക്തമാക്കി. ഇപ്പോൾ കുടുംബത്തോടൊപ്പം സമയം ചെലവഴിക്കാൻ ആഗ്രഹിക്കുന്ന ഒരു സ്ത്രീയെ എന്തിനാണ് സോഷ്യൽ മീഡിയയിൽ പരിഹസിക്കുന്നതെന്നും അദ്ദേഹം ചോദിച്ചു.

സോഷ്യൽ മീഡിയയിലൂടെയുള്ള നിരന്തരമായ അധിക്ഷേപങ്ങൾ വ്യക്തികളുടെ മാനസികാരോഗ്യത്തെ ദോഷകരമായി ബാധിക്കുമെന്നും അത് ഗുരുതരമായ പ്രത്യാഘാതങ്ങളിലേക്ക് നയിക്കുമെന്നും സൽമാൻ മുന്നറിയിപ്പ് നൽകി. വ്യാജ അക്കൗണ്ടുകൾ ഉണ്ടാക്കി മറ്റുള്ളവരെ താഴ്ത്തിക്കെട്ടി പണം സമ്പാദിക്കുന്ന രീതി നിർത്തി, മറ്റുള്ളവരെ പരിഹസിക്കുന്നതിന് മുൻപ് സ്വന്തം ജീവിതത്തിലേക്കും ആരോഗ്യത്തിലേക്കും നോക്കാൻ താരം ഉപദേശിച്ചു.