ഓഹരി വിപണിയിൽ അംബാനി തരംഗം: 35,000 കോടിയുടെ ജിയോ ഐപിഒ ഒക്ടോബർ അവസാനത്തോടെ

ഇന്ത്യൻ ഓഹരി വിപണി ഏറെ പ്രതീക്ഷയോടെ കാത്തിരിക്കുന്ന റിലയൻസ് ജിയോയുടെ ഐപിഒ ഒക്ടോബർ അവസാനത്തോടെ ഉണ്ടാകുമെന്ന് റിപ്പോർട്ടുകൾ വ്യക്തമാക്കുന്നു. ജിയോ പ്ലാറ്റ്‌ഫോംസിന്റെ എന്റർപ്രൈസ് വാല്യുവേഷൻ 12 ലക്ഷം കോടി രൂപയ്ക്ക് മുകളിലായിരിക്കും (ഏകദേശം 143 മുതൽ 146 ബില്യൺ ഡോളർ) എന്നാണ് ബാങ്കിങ് മേഖലയിലെ വൃത്തങ്ങൾ സൂചിപ്പിക്കുന്നത്. ഏകദേശം 35,000 കോടി രൂപയ്ക്ക് മുകളിൽ (3.8 ബില്യൺ ഡോളർ) വരുന്ന ഈ ഐപിഒ യാഥാർത്ഥ്യമായാൽ രാജ്യത്തെ ഏറ്റവും വലിയ ഐപിഒകളിൽ ഒന്നായി ഇത് മാറും.

ഐപിഒയ്ക്ക് മുന്നോടിയായി അമേരിക്ക, യുകെ, ദുബായ്, ഹോങ്കോങ്, സിംഗപ്പൂർ തുടങ്ങിയ ആഗോള സാമ്പത്തിക കേന്ദ്രങ്ങളിൽ വിദേശ നിക്ഷേപകരെ ലക്ഷ്യമിട്ട് സംഘടിപ്പിച്ച റോഡ്‌ഷോകൾ വിജയകരമായി പൂർത്തിയായിട്ടുണ്ട്. ജിയോ പ്ലാറ്റ്‌ഫോംസ് മാനേജിങ് ഡയറക്ടർ ആകാശ് അംബാനിയും റിലയൻസ് റീട്ടെയിൽ വെഞ്ചേഴ്‌സ് എക്‌സിക്യൂട്ടീവ് ഡയറക്ടർ ഇഷ അംബാനിയുമാണ് ഈ റോഡ്‌ഷോകൾക്ക് നേതൃത്വം നൽകിയത്. ഇതിലൂടെ ലഭിച്ച മികച്ച പ്രതികരണം കൂടിയാണ് കമ്പനിയുടെ ഉയർന്ന വാല്യുവേഷന് ആധാരം.

ഒക്ടോബർ 12-ന് ആരംഭിക്കുന്ന ആഴ്ചയിൽ ജിയോ അന്തിമ ഐപിഒ രേഖകൾ സെബിക്ക് സമർപ്പിക്കുമെന്നാണ് കരുതപ്പെടുന്നത്. ഇതോടൊപ്പം രാജ്യത്തിനകത്തെ റോഡ്‌ഷോകളും നടക്കും. ദസറയ്ക്ക് മുമ്പ് ആങ്കർ നിക്ഷേപകർക്കുള്ള നടപടികൾ ആരംഭിക്കാനും, ദസറയ്ക്ക് ശേഷം ഒക്ടോബർ 23-ഓടെ പൊതുജനങ്ങൾക്ക് ഐപിഒ തുറന്നു നൽകി മാസ അവസാനത്തോടെ വിപണിയിൽ ലിസ്റ്റ് ചെയ്യാനുമാണ് ലക്ഷ്യമിടുന്നത്.

കമ്പനിയുടെ ഡ്രാഫ്റ്റ് പ്രോസ്‌പെക്ടസ് പ്രകാരം 27 കോടി വരെ പുതിയ ഓഹരികളാണ് പുറത്തിറക്കുന്നത്. ഇത് ഐപിഒയ്ക്ക് ശേഷമുള്ള മൊത്തം ഓഹരി മൂലധനത്തിന്റെ ഏകദേശം 2.9 ശതമാനം വരും. ജൂണിൽ സമർപ്പിച്ച ഡ്രാഫ്റ്റ് രേഖകൾക്ക് ഓഗസ്റ്റ് 28-ന് സെബിയുടെ അന്തിമ അനുമതി ലഭിച്ചിരുന്നു. 2008-ന് ശേഷം റിലയൻസ് ഗ്രൂപ്പിൽ നിന്നുള്ള ആദ്യ ഐപിഒ എന്ന പ്രത്യേകതയും ഇതിനുണ്ട്. ടെലികോം വിപണിയിൽ 39.29 ശതമാനം വിപണി വിഹിതവും 50.6 കോടി ഉപഭോക്താക്കളുമുള്ള ജിയോ, നിലവിൽ ക്ലൗഡ്, ആർട്ടിഫിഷ്യൽ ഇന്റലിജൻസ്, എന്റർപ്രൈസ് നെറ്റ്‌വർക്ക് മേഖലകളിലേക്കും ബിസിനസ് വ്യാപിപ്പിച്ചിട്ടുണ്ട്.